DILI, 04 abríl 2024 (TATOLI)— Prezidente Repúblika, José Ramos Horta, kinta ne’e, halo sorumutuk ho Primeiru Ministru, Xanana Gusmão hodi diskute situasaun seguransa rai-laran liuliu louva manuturidade populasaun tomak tanba selebra santa pásku liuliu semana santa hahú hosi Kinta-Feira Santa to’o ho Domingu resureisaun atividade misa hotu la’o hakmatek.
“Prezidente apresia no fó parabéns ba sidadaun hotu tanba situasaun agora kalma tebes, iha selebrasaun páskua ne’e mós iha ámbitu hakmatek, ema barak partisipa páskua ne’e ho másimu tebes, ida ne’e hatudu katak povu ne’e iha ona maturiade ne’ebé di’ak kontribui ba pás,” Primeiru Ministru Xanana hato’o asuntu ne’e hafoin sorumutuk ho Xefe Estadu iha Palásiu Presidensiál iha Bairru-Pité-Dili.
Suspende atividade GAM
Iha enkontru referidu, Xefe Governu mós aprezenta posizaun ezekutivu sira ne’ebé deside kontinua suspende atividade Grupu Arte Marsiál (GAM) to’o fulan-outubru ho objetivu atu muda mentalidade joven sira nian hodi kria unidade no labele haketak malu.
“Suspensaun ne’ebé Governu extende ne’e atu muda tiha mentalidade joven sira nian ne’ebé hakarak haketak malu, lakohi hamutuk ona, ida-ne’e mak horiseik iha Konsellu Ministru aprova tan rezolusaun hodi suspende tan arte marsiál sira nia ativiade ba fulan neen tan,” Xefe Governu afirma.
Suspensaun ne’e hanaruk tan, PM Xanana dehan la’ós kastigu ba GAM, maibé tanba iha fatin balu membru balun kontinua kria konflitu.
“Maibé, iha tempu fulan-neen nia laran Governu sei buka influénsia, motiva atu loke kompetisaun, nune’e arte marsiál sira bele kompete, tanba arte nia objetivu mak kompete malu iha fatin própriu ba arte la’os iha fatin públiku ne’ebé impede movimentasaun públiku,” Eis Prezidente ne’e afirma.
Durante fulan-neen mak iha mudansa signifikativu hosi GAM sira la hamosu konflitu mak Governu sei re-ativa hikas atividade, nune’e loke mós kompetisaun. “Fulan-neen ne’e ba sira atu hadi’a aan tan,katak arte ne’e arte, la’ós hamosu konflitu”.
Xefe Governu mós respeita PR Horta nia idea ka sujestaun, maibé Governu deside suspensaun atividade atu garante situasaun hakmatek iha rai-laran.
“Loos, Prezidente nia hanoin ne’e ami simu, maibé durante ne’e ami kontaktu ho lidere arte marsiál balun sira seidauk iha kontrola di’ak ba sira nia membru sira. Nune’e suspensaun fulan-neen atu nune’e lider sira hotu kontrola membru sira, ida ne’e mak ha’u informa ba Prezidente maske la konkorda, maibé Prezidente nia direitu. Ami hasai ona rezolusaun suspensaun ba fulan-neen tan,” nia afirma.
Notísia relevante:Governu planeia hodi realiza kompetisaun ba GAM
Jornalista: Hortencio Sanchez
Editór : Florencio Miranda Ximenes
