Programa Ensinu Rekorrente iha Covalima reativa ona
COVALIMA, 04 Abríl 2024 (TATOLI) – Prosesu ensinu-aprendizajen iha ensinu rekorrente iha Covalima reativa ona, iha Marsu, no rejista alunu hamutuk 208, informa Diretora Servisu Edukasaun, Elda de Fátima.
“Hafoin Servisu Munisipál Edukasaun Covalima hala’o monitorizaun ba implementasaun Programa Ensinu Rekorrente, ita reativa prosesu aprendizajen iha Marsu ne’e, tanba antes ne’e ladún la’o”, Elda de Fátima hateten, ohin.
Antes ne’e, Edukasaun Covalima hetan krítika husi lidér lokál sira kona-ba implementasaun programa referidu ne’ebé ladún efetivu, tanba ne’e edukasaun halo observasaun no reativa hikas sentru formasaun ba ensinu rekorrente hamutuk 12.
Tuir oráriu, prosesu ensinu-aprendizajen iha sentru formasaun Akar-Laran, iha postu administrativu Suai realiza iha tersa no kinta, sentru formasaun Lakonak-Babu iha segunda no sesta, sentru formasaun Fatuisin iha tersa no sesta, sentru formasaun Quiar iha segunda no kinta, no sentru formasaun Leogore iha tersa no sesta.
Iha postu Zumalai, iha sentru formasaun Reasu kuarta no sesta, sentru formasaun Zulo tersa no sesta no sentru formasaun Bauraikun iha segunda no kinta. Iha postu Tilomar, iha sentru formasaun Besak-oan iha segunda-kinta, sentru formasaun Beidasi segunda no tersa, sentru formasaun Fatuk Kabuar Leten segunda no sesta no iha postu Fatumea iha sentru formasaun Macocon tersa no kinta.
Bazea ba dadus husi 2018 to’o 2023, totál formandu husi postu administrativu Fatululik, Fatumea, Fohorem, Tilomar, Maucatar, Suai no Zumalai hamutuk 1.026, husi númeru ne’e formandu ne’ebé tuir avaliasaun hatene letra no lee uitoan hamutuk 535 ka 52% no formandu ne’ebé la tuir avaliasaun finál hamutuk 491 ka 48%.
Orsamentu Jerál Estadu ba tinan 2024 aloka Servisu Edukasaun Covalima hamutuk $ 1,843.785 husi verba ne’e prevee ba Programa Ensinu Rekorrente hodi hala’o atividade alfabetizasaun ba adultu sira hamutuk $41.280.
Ensinu rekorrente destina ba indivíduu sira ne’ebé ultrapasa idade indikada ba frekuénsia atu tuir ensinu báziku no sekundáriu, sira ne’ebé kompleta ona ensinu báziku no idade liu ona entre tinan 16 no 18, nomós sira ne’ebé seidauk iha oportunidade atu enkuadra iha edukasaun eskolár iha idade normál ba formasaun.
Formadora ensinu rekorrente husi Fatululik, Jeliana Gorrete, dehan Servisu Edukasaun Covalima reativa programa ne’e iha fin Marsu, nune’e formadór sira hanorin bazeia ba oráriu ne’ebé kria ona.
“Dalaruma fomandu sira lakohi mai, entaun hanesan formadora tenke tuir to’o iha sira-nia uma hodi halo esplikasaun kona-ba programa ensinu rekorrente”, dehan.
Notísia relevante:Autoridade Covalima husu Edukasaun kontrola implementasaun Programa Ensinu Rekorrente
Jornalista: Celestina Teles
Editora: Maria Auxiliadora
