COVALIMA, 04 Abríl 2024 (TATOLI) – Diretór Servisu Munisipál Saúde Covalima, Domingos Sequeira, husu ba komunidade bainhira asu tata labele izola aan iha uma, maibé presiza hakat bá sentru saúde ne’ebé besik hodi hetan tratamentu ka simu vasina atu halo prevene husi moras raiva.
“Ita munisípiu ne’ebé hela besik iha fronteira ita atu halo prevensaun, iha loron-15 Abríl tinan-ne’e ita hala’o atividade advókasia nivél munisipál atu habelár informasaun bainhira asu tata maluk-sira karik nia prevensaun no prosesu akompañia ne’e oinsa” , Domingos informa, iha Camnasa, ohin.
Raiva afeta sistema nervozu sentrál husi animál infetadu ho vírus, tranzmite ba ema liuhusi kabeen. Se animál ida, ezemplu asu, infetadu ho raiva no tata ema ida, indivíduu ne’e bele infetadu.
Dirijente ne’e esplika katak sintoma husi raiva iha ema mak moras ka katar iha kanek fatin, ema tauk bee, intoleránsia ba barrullu, ta’uk naroman, durasaun moras baibain loron rua ka tolu, maibé bele estende ba loron neen liu bainhira hetan kuidadu insentivu, isin-manas, sente kolen, ulun moras ho durasaun loron-haat, hirus no depresaun iha faze ikus no haree bee halo kakorok gargante metin.
“Hafoin asu tata saida mak presiza halo mak fase kedas kanek ho sabaun ho bee durante minutu 10-15, karik laiha sabaun solur ho bee de’it. Ida-ne’e mak hanesan tratamentu primeiru sukorru efetivu liu ba raiva. Evita aplika irritasaun ba kanek hanesan ai-manas rahun, sumu hosi planta ásidu no taka kanek ho hena ka ligadura”, dehan.
Responsavél ba imunizaun Saúde Covalima, Mário Gusmão, dehan Saúde Covalima nia preparasaun ba halo prevensaun mak distribui ona vasina raiva ba sentru saúde hitu.
Stock vasina raiva hamutuk viál 59, husi númeru ne’e distribui ona ba sentru saúde Fatumea, Fatululik, Tilomar, Maucatar, Fohorem kada viál sanulu, Zumalai lima no Suai sia.
Tuir dadus Ministériu Saúde, vítima hamutuk 49 mak asu tata ona iha Oé-Cusse, husi númeru ne’e na’in-rua mak tama iha kategoria daruak, signifika tata maibé lakanek no kategoria datoluk katak kanek iha 47.
Notísia relevante: Asaun peventiva ba moras raiva komisaun nasionál sensibiliza iha fronteira
Jornalista: Celestina Teles
Editora: Maria Auxiliadora
