Estudante ESG 4 Setembru UNAMET na’in-17 deten iha sela PNTL

DILI, 05 abríl 2024 (TATOLI) – Hafoin konfrontu entre estudante Eskola Sekundáriu Jerál (ESG, sigla portugés) 4 Setembru UNAMET, Balide, Dili, ho Eskola Sekundáriu Nobel da Paz, iha dadeer, maizumenus 10h00, Polísia Nasionál Timor-Leste (PNTL), kaptura estudante hamutuk 23 hodi kumpre oras 72 iha sela PNTL Caicoli.

“Horiseik dadeer maizumenus tuku sanulu, estudante husi eskola sekundáriu Nobel da Paz, asaltu estudante husi Eskola Sekundáriu Jerál 4 Setembru Balide, no ikus PNTL kaer estudante na’in 22 no eskola Nobel da Paz ida, hodi kumpre oras 72, iha sala PNTL nian. Maibé ami-nian ne’e ema na’in neen husik fali tanba menoridade, hela na’in-17 mka kumpre sela”, Adjuntu Diretór Eskola Sekundáriu Jerál (ESJ) 4 Setembru UNAMET, Balide, Alexandre Belo, hateten ba Tatoli, iha nia knaar fatin, Balide, sesta ne’e.

Adjuntu Diretór ESJ no 4 de Setembru Balide, afirma katak, tanba akontese iha dalan públiku mak PNTL nia servisu hodi haree katak sira-ne’ebé kaer sala ka lae, tanba tuir nia hatene katak estudante sira-ne’e sai ba haree la’ós ba baku-malu.

“Iha dalan-boot ne’e CCTV barak PNTL bele kofirma iha ne’ebá tanba ha’u hatene labarik sira-ne’e la sala, sira ba haree, no sira sente la mete problema entaun sira la halai bainhira polísia tama hodi asegura. Maibé ikus kaer fali labarik ne’ebé la sala. Ida-ne’e PNTL nia servisu ita akompañia de’it, depois sira kumpre sela iha oras 72,” nia haktuir.

Nia dehan, horibain rua lorokraik sira tuda mai atu kona tan profesora ida halo vizilánsia iha-ne’e, no ohin dadeer mai asaltu tan iha ne’e, problema ne’e iha fatin ne’ebe karik, sira diretiva mós laiha koñesementu.

“Ema hotu hatene, komunidade mós hatene, eskola iha ne’e hakmatek hala’o ezame, depois sira mai asaltu ne’e mak sai nune’e, agora ezame hotu fila ba uma, ne’e ami labele akompañia, estudante fila hotu ona, tanba ohin matéria rua de’it, PNTL kaptura ne’e dehan iha Ministeriu Interiór nian oin, maibé ami la hatene, tanba laiha informasaun mai ami,” nia afirma.

Iha fatin seluk, Diretór Eskola Sekundáriu Nobel da Paz, Jeremias de Jesus, haktuir katak estudante ida, ohin polisia kaer ona, maibé buat ne’e hanesan ne’e, horseik sira mak hein iha dalan, no antes ne’e sira fó ona informasaun ba polísia, kuandu iha li’ur ona, ne’e inan-aman ho polísia nia servisu.

Jornalista : Osória Marques

Editór: Rafael Ximenes de A. Belo