DILI, 05 Abríl 2024 (TATOLI) – Estadu Unidu Amérika (EUA) no Governu Timor-Leste kontinua realiza Programa Farmer-to-Farmer (F2F) ba tinan lima nia laran hodi promove agronegósiu no nutrisaun atu hasa’e seguransa ai-han ba família agrikultór sira iha Timor-Leste.
Programa F2F ne’ebé lansa ne’e sei implementa husi Catholic Relief Services (CRS) ne’ebé hetan mós kolaborasaun husi Ministériu Agrikultura, Pekuária, Peska no Floresta.
Diretór interinu Ajénsia Estadu Unidu ba Dezenvolvimentu Internasionál (USAID, sigla inglés), Mark Anthony White, informa katak Programa F2F ne’e sei hadi’a dezenvolvimentu negósiu agrikultór sira-nian no nutrisaun. Programa ne’e mós sei hadi’a seguransa ai-han liuhusi hadi’a prátika halo to’os atu ajuda membru família sira adapta ba mudansa klimátika no asegura produtu nutrisaun iha merkadu lokál.
”Programa ne’e atu reforsa valór sira inklui haki’ak animál, ikan no produtu ne’ebé riku ho nutrisaun no mós apoiu ba negósiu ho eskala boot ba agrikultór sira. Programa F2F sei hadi’a sistema ai-han hodi haburas ekonomia iha Timor-Leste”, Mark Anthony hateten iha Timor Plaza, ohin.
Nia dehan programa ne’e mós sei ajuda dezenvolve oportunidade esportasaun ba produtu sira ne’ebé ho valór boot hanesan mina, kamii, mina-nuu, baunilla no kakau.
Nune’e mós Sekretáriu Estadu Peska, Domingos dos Santos, dehan programa ne’e kontinua realiza tanba konsidera fó duni benefísiu ba família agrikultór sira iha país. Programa ne’e implementa tiha ona iha fulan-Outubru 2018- Setembru 2023 no konsege hatudu progresu.
“Ita lansa filafali programa ne’e hodi kontinua apoia ita-nia agrikultór sira atu haburas ekonomia ba tinan ida ne’e, hahú husi 2024 to’o 2028. Ha’u agradese tebes ba Estadu Unidu Amérika, liuhusi USAID no CRS, tanba iha nafatin inisiativa di’ak hakarak kontinua implementa programa ne’e. Ami presiza duni ita-boot sira-nia apoiu hodi ajuda família agrikultór sira”, nia afirma.
Jerente CRS, Yane Pinto, relata katak programa F2F fasilita ona ligasaun entre voluntáriu Estadu Unidu no membru organizasaun agrikultura iha nasaun sira ho rendimentu ki’ik no médiu. Voluntáriu sira ne’e fornese asisténsia téknika ba tempu badak ho tópiku oioin kona-ba agrikultura nian hodi apoia seguransa ai-han no haburas ekonomia sustentavel.
“Sira-nia serbisu atu aumenta produsaun, hadi’a ka aumenta lukru negósiu, rezolve dezafiu jestaun rekursu, no hadi’a rendimentu sira no finansiamentu ba Programa Farmer-to-Farmer husi USAID no ida ne’e hatudu kompromisu governu Estadu Unidu nian atu investe iha ekonomia sustentavel no seguransa ai-han iha Timor-Leste”, dehan.
Entre 2021 no 2025, embaixada Estadu Unidu iha Timor-Leste kontribui osan hamutuk millaun $92 hodi hadi’a ekonomia Timor-Leste nian no promove governasaun di’ak. Dezde restaurasaun independénsia Timor-Leste nian, USAID kontribui ona millaun $323-resin hodi promove dezenvolvimentu inkluzivu pasífiku atu nasaun ne’e próspera, saudavel no autosufisiénsia.
Notísia relevante: USAID iha kompromisu apoia TL hametin valór demokrásia no kombate korrupsaun
Jornalista: Tomé Amado
Editora: Maria Auxiliadora
