DILI, 05 abril 2024 (TATOLI)—Governu liuhosi Ministériu Administrasaum (MAE) sei halo lansamentu ba kartaun biométriku iha loron 04 maiu 2024, iha munisípiu Manatutu.
Ministru Administrasaun Estatál, Tomás do Rosário Cabral, hateten, Primeiru-Ministru, Kay Rala Xanana Gusmão no Prezidente Repúblika, José Ramos Horta, sei halo lansamentu ba programa ne’e.
“Objetivu kartaun biométriku mak hakarak atu hatene dadus loloos, tanba dadus populasaun ne’ebé MAE iha la hanesan ho dadus resensiamentu eleitorál nian, tanba ema balun resensia tiha la ba atualiza no ema mate mós ita la atualiza, entaun númeru ne’e nafatin, agora ita presiza halo atualizasaun resensiamentu biométriku hodi hatene dadus loloos, tanba sempre iha ema ne’ebé kada tinan la ba vota ne’e 19% to’o 23%,” Ministru informa iha salaun Delta Nova, sesta ne’e.
Notisia relevante : STAE prepara rihun $600 prodús kartaun biométriku-realiza eleisaun suku 2024
Aleinde ne’e, iha juñu 2024 sei halo resensiamentu iha territóriu nasionál.
Kartaun biométriku hanesan kartaun seguru liu no eletróniku, ne’ebé elementu sira iha futuru sei introdús no bele utiliza eletronikamente ba prosesu eleisaun sira tuir mai. Kartaun biométriku sei substitui kartaun eleitorál, ne’ebé iha deferensa modelu no kustu.
Bainhira iha ona kartaun eleitorál biométriku, iha eleisaun karik la presiza uza lista votante maibé leno de’it ba sistema dadus sira.
Sistema biométriku mós bele kontribui ba buat ruma ne’ebé akontese, ezemplu, votante ida mak vota ona mak tenta vota tan iha fatin seluk maka sistema ne’e bele identifika automátikamente.
Jornalista : Arminda Fonseca
Editora : Julia Chatarina
