DILI, 07 novembru 2023 (TATOLI)–Diretór Jerál Sekretariadu Tékniku Administrasaun Eleitorál (STAE), Acilino Manuel Branco, hateten STAE prevee orsamentu adisionál $600.000 atu prodús kartaun biométriku no realiza eleisaun suku iha 2024.
Notísia Relevante Introdús sistema biométriku, STAE sei konsulta ho TIC-Timor-Leste
“Ami iha orsamentu adisonál lori apoiu ba suku 10 ne’ebé nia eleisaun suku sei hala’o iha tinan 2024. Nune’e mós implementa resesiamentu ba kartaun biométriku nian,” Diretór ne’e hateten ba Agência Tatoli, iha nia kna’ar fatin, Caicoli, tersa ne’e.
Tanba, tuir nia, sistema biométriku hanesan kartaun seguru liu no eletróniku ne’ebé sei substitui kartaun eleitorál, ne’ebé elementu sira iha futuru sei introdús no bele utiliza eletronikamente ba prosesu eleisaun sira tuir mai.
“Biométriku ne’e sei substitui ba kartaun eletorál ida agora ne’e maibé nia deferensa mak modelu no nia kustu,” nia hateten.
Sistema biométriku ne’e mós bele kontribui ba buat ruma ne’ebé akontese, ezemplu votante ida mak vota ona mak tenta vota tan iha fatin seluk, entaun sistema ne’e bele identifika automatikamente.
Antes ne’e, iha 2021 liubá, antigu Vise-Ministru Administrasaun Eatatál no antigun Diretór Jerál STAE, Tomás do Rosário Cabral, aprezenta paresér ida ba Komisaun A, katak dadus biométriku ne’ebé STAE sei uza atu halo identifikasaun ba eleitór sira.
“Bainhira ita ko’alia kona-ba dadus biométriku, iha dadus biométriku barak atu identifika ema-ida-nia isin bele uza hanesan: impresaun dijitál, rekoñesimentu ba matan (matan-fuan, ninia retina ka iris), jeomteria liman nian, rekoñesimentu ba ita-nia oin, rekoñesimentu ba ita-nia lian no seluk tán. STAE sei uza dadus biométriku ida-ne’ebé loos tanba agora STAE uza hela de’it impresaun dijitál,” Tomas Cabral hateten.
Nune’e mós, iha kinta (24 juñu 2021), Deputadu sira hosi Komisaun A ne’ebé trata asuntu Konstitusionál no Justisa, aprova proposta realizasaun resensiamentu dadus biométriku nune’e sei implementa hosi Sekretariadu Tékniku Administrasaun Eleitorál (STAE) iha 2022 tanba introdús ona iha lei resensiamentu eleitorál.
Antigu Ministru Administrasaun Estatál, Miguel Pereira de Carvalho, hateten alterasaun prinsipál ba lei resensiamentu eleitorál ne’e atubele rezolve problema téknika sira-ne’ebé STAE enfrenta relasaun ho baze dadus.
Tanba durante ne’e STAE iha baze dadus ne’ebé mak rejista sidadaun hotu-hotu depois prodús kartaun eleitorál no emite kartaun eleitorál.
“Lei vijente la espesífika ho detallada kona-ba informasaun sira-ne’e. Seluk tán mak ho resensiamentu eleitorál mak ami introdús resensiamentu biométrika hodi rejista informasaun biométriku ema-nian tantu matan, oin no liman nune’e sai informasaun atubele introdús iha baze dadus eleisaun nian. Planu resensiamentu biométriku ne’e sei hala’o iha tinan oin maibé ami hakarak introdús ona iha lei resensiamentu eleitorál,” Miguel Pereira de Carvalho informa ba Agência TATOLI, iha salaun Mukit, suku Aissirimou, munisípiu Aileu.
Alterasaun prinsipál ida tán mak bainhira STAE halo resensiamentu eleitorál nia hakarak rejista de’it sidadaun timoroan sira-ne’ebé mak iha ona identidade nasionál.
“Neste momentu partisipa iha resensiamentu presiza lori dokumentu lima mak hanesan pasaporte, Billete Identidade (BI), sertidaun RDTL, sertidaun batizmu nomós sédula komunidade Izlámika sira-nian. Maibé STAE hakarak hasai tiha balun no husik de’it mak rekizitu prinsipál sira hanesan pasaporte, kartaun eleitorál no sertidaun RDTL. Ne’e mak alterasaun prinsipál iha lei resensiamentu eleitorál ne’e,” nia dehan.
Notísia Relevante: Biométriku sei substitui kartaun eleitorál
Jornalista : Osória Marques
Editór : Cancio Ximenes
