DILI, 05 Abríl 2024 (TATOLI) – Diresaun Nasionál Kuarentena no Biosseguransa, Ministériu Agrikultura, Pekuária, Peska no Floresta (MAPPF) hasai ona sirkulár hodi bandu populasaun iha Rejiaun Administrativa Espesiál Oé-Cusse Ambeno (RAEOA) lori sai asu, busa no lekirauk bá munisípiu seluk, liuliu Covalima, Bobonaro no Dili, nune’e bele prevene vírus raiva.
Diretór Unidade Kuarentena no Biosseguransa, Manuel da Costa, hateten desizaun Kuarentena hasai sirkulár ne’e tanba haree ba kazu, liuliu asu tata ema iha Oé-Cusse no diresaun halo ona asaun ne’e hodi prevene moras raiva.
“Moras ne’e mai husi animál no ida ne’e parte husi serbisu kuarentena nian atu halo kontrolu hodi prevene. Husi akontesimentu kazu asu tata komunidade iha Oé-Cusse, ita hasai ona sirkulár ida ba RAOEA atu labele hatama asu ba munisípiu tolu”, diretór dehan ba Tatoli iha edifísiu Kuarentena, iha Aeroportu Comoro, ohin.
Manuel da Costa haktuir bainhira akontese ona kazu ne’e, loloos área referida tenke tama ona iha izolamentu, maibé laiha desizaun ida husi Governu, liuliu Ministériu Saúde ba kazu ne’e, entaun servisu Kuarentena nian hasai de’it sirkulár hodi bandu komunidade sira atu labele hatama asu ba munisípiu tolu no husu ba sira atu kumpre regulamentu sira ne’e.
“Karta sirkulár ne’e husu ba sira atu labele lori sai animál asu husi área ka fatin afetadu ba raiva, liuhusi transporte terrestre, aéreu no marítimu. Ita husu ona ba funsionáriu sira ne’ebé serbisu iha sentru Kuarentena iha Oé-Cusse atu tau-matan ba komunidade sira. Karik iha balun maka seidauk hetan ka seidauk simu informasaun kona-ba avizu ne’e bele orienta sira atu la hatama animál sira ne’e bá fatin seluk”, dehan.
Asaun ne’e kuarentena halo hodi tulun ekipa sira ne’ebé halo vasinasaun ba asu sira, nune’e bele kompleta vasinasaun iha segunda faze iha Oé-Cusse no munisípiu tolu seluk.
Tuir nia, depoizde semana rua diresaun hasai sirkulár, to’o agora seidauk iha dadus kuarentena nian maka rejista komunidade Oé-Cusse tenta hatama asu ba munisípiu seluk.
Abitante Oé-Cusse, Ana Paula Sabu, ne’ebé daudaun hela iha Dili simu informasaun husi família sira kona-ba sirkulár Kuarentena nian ne’ebé bandu hatama asu. Ba nia, ida ne’e asaun ida di’ak tanba agora moras raiva fó ameasa ba ema nia vida.
“Intervensaun parte Kuarentena nian ba kazu raiva ne’e buat ida pozitivu tebes, tanba ita hotu hakarak livre husi vírus ne’e. Ha’u husu ba família sira inklui komunidade Oé-Cusse atu haki’ak asu karik di’ak liu tenke hetan vasina hodi labele hada’et vírus ba ema”, nia sujere.
Tuir dadus Ministériu Saúde, vítima hamutuk 49 mak asu tata ona iha Oé-Cusse, husi númeru ne’e na’in-rua mak tama iha kategoria daruak, signifika tata maibé lakanek no kategoria datoluk katak kanek iha 47.
Notísia relevante: Asaun peventiva ba moras raiva komisaun nasionál sensibiliza iha fronteira
Jornalista: Tomé Amado
Editora: Maria Auxiliadora
