VIQUEQUE, 05 abríl 2024 (TATOLI)- Ministru Agrikultura, Pekuária, Peska no Floresta (MAPPF), Marcos da Cruz, sesta ne’e, ofisialmente entrega tratór ho marka Kubota L5018 unidade haat ba Prezidente Autoridade Munisípiu Viqueque, Francisco Cruz Simõs de Gonzaga Soares.
Hafoin ramata MAPPF, Marcos da Cruz, esplika, iha tempu uluk tratór boot hotu-hotu iha nasionál maka haruka ba kada munisípiu sira, maibé agora Governu muda mekanizmu distribuisaun halo iha munisípiu no entrega ba PAM.
“Tanba Governu sente dezentralizasaun ne’e importante ba nasaun Tmor Leste hodi dezenvolve ita-nia rai. Nune’e ba Govenu ida-ne’e hakarak dudu prosesu sira-ne’e katak autoridade koloka ona iha munisípiu ida-idak hodi jere no tau matan ba ekipamentu ne’ebé husi Governu sentrál. Kona-ba tratór boot haat ne’e iha fulan kotuk haruka uluk tiha ba munisípiu Viqueque, hodi hein PAM foun maka entrega hodi responsavél ba ekipamentu tratór sira-ne’e. Tanba ne’e maka agora ami ofisiliza entrega direta ba autoridade ida-ne’e hodi tau matan no jere atu responde ba nesesidade povu agrikultór sira iha munisípiu Viqueque”, Ministru Marcos da Cruz, hateten hafoin ramata distribui tratór ba PAM Viqueque, iha resintu Viqueque, ohin.
Objetivu distribuisaun tratór hakarak hadi’a no dezenvovle setór agrikutór iha futuru hodi povu agrikultór sira iha munisípiu Viqueque bele moris di’ak. Kona-ba ekipamentu tratór orsamentu manutesaun inklui oilio no mina sei responsavél MAPPF,maibé jestaun ba opersaun ba tratór sei kontrola tomak husi PAM munisípiu Viqueque no Servisu Agrikultór munisípiu.
“Tanba ita hakarak hadi’a menizmu servisu hodi dudu setór agrikutura iha Timor Leste. Nune’e MAPPF no Ministériu Administrasaun Estatál (MAE) koordena hamutuk hodi haree ba asuntu setór agrikultura liuliu iha munisípiu sira, atu aseleira servisu liuliu ba setór agrikultura”,Nia afirma.
Iha mandatu Governu dalima sosa uluk tratór boot no aloka mai munisípiu Viqueque hamutuk unidade 39, maibé tratór boot neen maka kondisaun aat totál no labele halo manutesaun tanba kustu boot liu. Nune’e tratór boot iha 36 maka sei ativu iha sentru Ratahau. Ho tratór boot haat foun ne’e atu reforsa tratór tuan sira-ne’ebé daudaun iha munisípiu Viqueque
Iha fatin hanesan, Francisco Cruz Simõs de Gonzaga Soares, agredese MAPPF ba apoia tratór boot unidade haat ne’ebé aloka mai munisípiu Viqueque hodi tulun povu agrikultór sira.
“Iha ami-nia kompromisu katak ami sei tau perioridade ba setór agrikultura, maske ami seiduak to’o iha MAPPF, maibé fó ona apoia ba ami ida-ne’e insiativa husi Minsitru rasik. Ho ekipamentu sira-ne’ebé ami simu ha’u sei orienta hodi la’o tuir ninia dalan, hodi servi ba povu no la haree ba kór politíku, la haree ba grupu no la haree rasa, maibé sei servi ba povu munisípiu Viqueque tomak liuliu postu lima”. Nia akresenta.
Entretantu iha serimónia distribuisaun tratór boot unidade haat ne’e Ministru entrega direta save tratór nian ba PAM Viqueque no kontinua entrega save ba diretór servisu agrikultór munisípiu Viqueque. Tratór foun unidade haat ne’e hetan bensaun husi Amu parokia Viqueque.
Iha serimónia entrega tratór boot ne’e hetan partsipa hosi komadante Polísia Nasionál Timor Leste (PNTL) munisípiu Viqueque, Administradór Postu lima, xefe suku no funsionáriu servisu agrikutura munisípiu Viqueque ne’ebé hala’o iha resintu administrasaun munisipál Viqueque.
Notísia relevante:MAPPF entrega tratór ba autoridade Baucau
Jornalista : Vitorino Lopes da Costa
Editór : Florencio Miranda Ximenes
