PAM no CVTL inaugura projetu bee-moos iha Zumalai
COVALIMA, 05 Abril 2024 (TATOLI) – Prezidente Autoridade Munisípiu (PAM) Covalima, Miguel Armada Cardoso, no Prezidente Krús Vermella Timor Leste (CVTL, sigla portugés), Madalena Hanjam, inaugura, ohin, projetu bee-moos iha aldeia Somo Kanua, suku Lour, postu Zumalai.
PAM Covalima hatete projetu ne’e realiza tanba halo kooperasaun ho CVTL ne’ebé sei fó benefísiu ba komunidade iha postu ne’e.
Miguel Cardoso salienta katak Organizasaun CVTL implementa projetu dada bee-moos iha fatin-fatin halo ona inaugurasaun, aleinde ne’e Programa Nasionál Dezenvolvimentu Suku (PNDS) mós dada bee-moos ba populasaun sira, maibé iha tempu bailoro mak volume bee menus no halo komunidade kontinua halerik ba bee.
Tanba ne’e, nia fó hanoin ba populasaun hodi utiliza bee ho kuidade no labele hein de’it Estadu, tanba Estadu nia liman-ain mak husi administradór postu to’o xefe aldeia sira no bainhira aat tenke fó kontribuisaun hodi hadi’a.
Prezidente CVTL nasionál, Madalena Hanjam, dehan organizasaun ne’e implementa projetu bee-moos ho apoiu finanseiru husi Ministériu Obra Públika, liuhosi Orsamentu Jerál Estadu 2023 hamutuk $35,626.25. Projetu ne’e hahú iha 24 Marsu 2023 no inaugura iha 05 Abríl tinan ne’e .
Projetu bee-moos ne’e benefisia populasaun rihun no xefe família 300-resin iha suku Lour, aldeia Somo Kanua no abitante iha Fatuleto, Raimea, Zulo, Mape, Lepo no Ucecai.
“Ami nafatin serbisu hamutuk ho autoridade munisípiu atu implementa projetu dada bee-moos ba faze daruak nian hamutuk ho IPG ne’ebé sei halo estudu hodi identifika bee-matan, nune’e ita bele dada bee-moos ba komunidade sira ne’ebé presiza”, nia informa.
Dezde 2000, CVTL simu proposta 400 sira atu dada bee-moos ba komunidade sira iha área rurál, husi númeru ne’e implementa ona projetu 140 ne’ebé hetan apoiu orsamentu husi Governu no Amigu CVTL. Falta proketi 160 mak CVTL buka dalan atu dada bee-moos ba populasaun sira.
Abitante Apolinário Magno kontente tanba organizasaun CVTL bele renponde ona sira-nia halerik, tanba dezde okupasaun Indonézia sira la asesu bee-moos. “Programa CVTL bele responde ona ami-nia halerik, tanba durante ne’e konsumu de’it bee-posu, maibé la’o ho distánsia kilómetru rua-resin”, nia relata.
Notísia relevante: Tinan ne’e, CVTL rejista doadór voluntáriu raan ba HNGV na’in-1.044
Jornalista: Celestina Teles
Editora:Maria Auxiliadora
