COVALIMA, 05 Abril 2024 (TATOLI) – Servisu Saúde Covalima koloka ona funsionáriu 81 iha postu saúde sira ne’ebé falta rekursu umanu hodi bele halo atendimentu ba populasaun sira.
Diretór Servisu Munisipál Saúde Covalima, Domingos Sequeira, esplika katak pesoál saúde ne’ebé koloka bá postu sira ne’e mak enfermeiru, parteira no médiku, hodi prienxe rekursu ne’ebé sei mamuk iha postu saúde balun no iha rekrutamentu faze daruak sei kompleta tan lakuna sira ne’e.
Responsavel ne’e salienta katak Ministériu Saúde koloka ona pesoál saúde 81 iha Covalima ne’ebé sei hala’o knaar iha postu saúde Bulu, Raimea no Kulu-oan iha Zumalai, iha postu saúde Foho-Lulik Tilomar no postu saúde Laktos iha Fohorem.
Tuir planu, Ministériu Saúde hakarak koloka enfermeira na’in-rua, médiku ida, tékniku aliadu ba farmásia no laboratóriu iha kada postu saúde, tanba ne’e ministériu esforsu hela atu atinje nia meta.
Tuir dadus, pesoál saúde kontratadu iha postu no sentru saúde Covalima hamutuk 142, husi númeru ne’e na’in-99 kontinua ona sira-nia kontratu ba programa Malária, Nutrisaun, Tuberkuloze, VIH/Sida, inklui administrasaun na’in-ida no motorista ida.
Covalima iha sentru saúde hitu ne’ebé kria iha postu administrativu Fatululik, Fatumea, Fohorem, Tilomar, Maucatar, Suai no Zumalai, no iha postu saúde 24 ho nia funsionáriu permanente hamutuk 331, husi númeru ne’e koloka ba sentru saúde no postu saúde iha Fohorem hamutuk 35, Fatumea 22, Fatululik 22, Maucatar 38, Tilomar 44, Zumalai 43 no Suai 76.
Xefe Suku Raimea Agostinho Sequeira, dehan Saúde Covalima koloka ona pesoál na’in-tolu atu halo atendimentu ba populasaun sira iha postu saúde Raimea.
“Pesoál saúde sira kompostu husi médiku, enfermeira no parteira dezloka mai iha segunda semana-ne’e no sira observa ona fatin”, nia hateten.
Suku Raimea iha nia aldeia Loro, Uma Klaran, Beilaku no Oebaba ho totál populasaun rihun 3-resin.
Notísia relevante: Saúde Covalima seidauk simu despaixu atu koloka pesoál ba postu sira
Jornalista: Celestina Teles
Editora: Maria Auxiliadora
