iklan

POLÍTIKA

PN sei fó prioridade diskute alterasaun lei CAC

PN sei fó prioridade diskute alterasaun lei CAC

Presidente Parlamentu Nasionál, Maria Fernanda Lay. Imajen Tatoli/Francisco Sony.

DILI, 05 abril 2024 (TATOLI)—Parlamentu Nasionál (PN) sei fó prioridade diskute inisiativa husi Governu ba alterasaun daruak hosi lei númeru 8/2009, loron 15 Jullu, Komisaun Antí-Korrupsaun (CAC, siglá portugés).

Notísia RelevantePN seidauk simu proposta alterasaun lei CAC husi Governu

“Lejislativa ne’e inisiativa proposta Governu nian, klaru ami sei tau prioridade, tanba tinan hira ona laiha (komisáriu CAC)/ Ida-ne’e ami mak dada malu, ha’u la konkorda. Se la konkorda hateten la konkorda, como tau votasaun presiza kórum dois terços, tanba presiza iha konsensu. Se konsensu labele ona, ita atu ba ne’ebé, entaun ita muda lei, ” Prezidente Parlamentu Nasionál (PN), Maria Fernanda Lay, hateten ba jornalista sira iha PN, sesta ne’e.

Prezidente PN ne’e foin fila husi rai-li’ur hala’o servisu balun, nune’e nia seidauk iha informasaun kona-ba simu ona proposta-lei ne’e Governu submete ona mai iha órgaun lejisladór ne’e. nune’e nia parte seidauk pronúnsia buat ruma.

Bainhira, nia dehan, simu ona proposta-lei ne’e baixa ba komisaun kompetente atu tau matan aselera halo lalais, tanba labele iha vakatura ida-ne’e iha tempu naruk.

“Agora altera oinsá, ha’u tenke haree lai. Se ha’u la haree labele pronúnsia, inisiativa ne’e mai husi Governu ho situasaun ne’ebé impase. Tanba ne’e, presiza altera hodi bele iha maiória simples (ba kórum). Agora artigu ne’ebé book (altera), ha’u seidauk iha koñesimentu, ” nia hateten.

Iha 27 Marsu 2024, Governu liuhusi reuniaun Konsellu Ministru (KM), aprova projetu proposta-lei, ne’ebé aprezenta husi Prezidénsia Konsellu Ministru, kona-ba alterasaun daruak hosi lei númeru 8/2009, loron 15 Jullu, Komisaun Anti-Korrupsaun (CAC, siglá portugés).

Ho alterasaun lei CAC, elimina rekezitu Deputadu ¾ marka prezensa iha eleisaun komisáriu CAC nian.

“Ho diploma ida-ne’e, Komisáriu sei bele eleitu ka ezoneradu ho maiória absoluta husi Deputadu sira iha Parlamentu Nasionál, no sei elemina rekezitu katak tenke pelumenus datoluk haat ka ¾ husi Deputadu sira marka prezensa ne’ebé hala’o hela funsaun, ” Vise Ministru Asuntu Parlamenár, Adérito Hugo da Costa, relata hafoin reuniaun ezekutivu, iha Palásiu Governu.

Governu halo alterasaun ba lejizlasaun ne’e tanba husik kedas CAC harii, ezijénsia husi kórum deliberativu reforsadu atu hala’o eleisaun ba Komsáriu difikulta ona prosesu eleitorál ne’ebé normál no regulár, nune’e afeta funsionamentu órgaun polísia kriminál espesializadu iha kombate korrupsaun.

Proposta-lei ne’e determina mós katak Komisáriu ne’ebé mandatu ramata ona bele kontinua hala’o ninia kna’ar to’o titulár foun simu pose, nune’e bele garante kontinuasaun servisu públiku no atinji misaun ne’ebé sai hanesan objetivu hodi kria CAC.

Enkuantu, Primeiru Ministru (PM), Kay Rala Xanana Gusmão, iha 04 fulan Abril ne’e, hafoin ramata enkontru ho Prezidente Repúblika, informa ba jornalista sira katak Governu haruka ona proposta alterasaun lei CAC ba PN hodi bele diskute no aprova.

Jornalista : Nelson de Sousa

Editór      : Cancio Ximenes

iklan
iklan

Leave a Reply

iklan
error: Content is protected !!