VIQUEQUE, 06 abríl 2024 (TATOLI)—Udan-boot ne’ebé akontese iha sabádu ne’e, maizumenus tuku 17:30 lorokraik, rezulta mota boot no ponte Sumaku iha suku Uma-tolu liga bá suku Dilór no postu administrativu Lacluta, munisípiu Viqueque, kotu.
Administradór postu Lacluta, Pascoal Gama Martins, haktuir, estrada dirasaun Viqueque liga bá postu Lacluta hanesan dalan úniku, nune’e ho akontesimentu ne’e sei difikulta transporte públiku sira-ne’ebé hala’o movimentu bá postu Lacluta no sai bá munisípiu Viqueque.
“Udan ohin ne’e ho ninia intensidade maka’as liu, nune’e mota tun hodi prejudika ba ponte Sumaku kotu. Dalan liga mai ami-nia postu mak ida-ne’e de’it, ita laiha dalan alternativa ruma, maibé agora ponte kotu sei impaktu ba movimentu transporte sira,” Pascoal Gama Martins, informa ba Agência Tatoli, ohin.
Nune’e, nia husu atu ministériu relevante atu rezolve ho karatér emerjénsia hodi labele difikulta atividade povu Lacluta, hanesan bainhira iha kazu emerjénsia ruma, karreta ambulánsia labele halo movimentu hodi halo transferénsia pasiente bá munisípiu no munisípiu labele asesu bá postu Lacluta.
“Daudaun ha’u tenta Servisu Obra Públika Viqueque no Governu sentrál nian tulun atu foti medida emerjénsia ruma hodi atende ba komunidade Lacluta nia movimentu entre Viqueque no Lacluta. Se la rezolve lalais maka sei hakotu komunidade nia roda ekonomia tanba labele halo movimentu,” nia tenik.
Notísia relevante : Ponte Uma-Tolu kotu, afeta ba atividade negosiante
Iha fatin ketak, Xefe suku Dilór, Jaicinto Ximenes, prefere Governu harii ponte permanente.
“Ha’u hanoin ponte ne’e Governu harii foun de’it, ita halo ona normalizasaun ba dala-tolu agora normaliza tan ba dala-haat. Ha’u sente ita gasta tempu, mota sei sobu no povu maka sai vítima beibeik,” Jacinto profunda.
Ponte referidu kotu dahuluk iha tinan 2019, tuir mai iha tinan 2021, 2023 no agora iha tinan ne’e, ohin kotu tan.
Iha tinan 2023, ponte Sumaku kotu uluk, nune’e negosiente sira halo de’it transasaun sasán ho folin nesesidade bázika sae, hafoin tékniku husi Institutu Jestaun Ekipamentu Apoiu Dezenvolvimentu Infraestrutura, Institutu Públiku (IGEADI, I.P) normaliza ponte Sumaku ne’ebé kotu.
Tuir dadus, postu Lacluta kompostu husi suku haat hanesan Uma-tolu, Dilór, Ahic no Laline, ho totál abitatente 8.123 husi uma-kain 1.907.
Jornalista : Vitorino Lopes da Costa
Editora : Julia Chatarina
