Embaixadór Wan Hadfy atualiza apoia Brunei Darussalam ba PM Xanana
DILI, 08 abríl 2024 (TATOLI)–Embaixadór Brunei Darussalam iha Timor-Leste, Wan Hadfi Latif, segunda ne’e, hasoru malu ho Primeiru-Ministru (PM), Kay Rala Xanana Gusmão, hodi atualiza apoia sira ne’ebé Brunei sei fó Timor-Leste.
“Objetivu husi sorumutuk ida-ne’e hodi haktuir filafali vizita husi Prezidente Repúblika Timor ba Brunei, iha fulan-novembru tinan kotuk ne’ebé iha momentu ne’ebá identifika setór importante tolu ba kooperasaun hanesan saúde, mina no gás, inklui edukasaun,” Embaixadór Brunei Wan Hadfi Latif hateten hafoin hasoru PM Xanana, iha Palásiu Governu.
Notísia relevante : Brunei Darussalam hakarak koopera ho TL dezenvolve setór edukasaun no petróleu
Brunei Darussalam daudaun ne’e halo hela diskusaun iha nível téniku ho Timor-Leste, ba realizasaun planu ne’e.
“Diskusaun nível tékniku entre Brunei ho Timor-Leste la’o hela, kona-ba saida mak Timor-Leste presiza iha kooperasaun ida-ne’e, maibe ein termu iha relasaun bilaterál, relasaun entre nasaun rua la’o di’ak tebes, liu-liu relasaun entre ami-nia Liurai ho Primeiru Ministru Xanana,” Diplomata ne’e haktuir.
Primeiru-Ministru promete sei koordena ho ministériu sira hodi ko’alia kona-ba diskusaun ida ne’e ba oin. Brunei hein de’it ekipa téknika, liu-liu sira ne’ebé sei ba Brunei hodi ko’alia ho kle’an.
Ligadu ho rekrutamentu ba traballadór timor-oan sira hodi bá serbisu iha rai-li’ur, reprezentante Brunei iha Timor-Leste ne’e konfirma katak, diskusaun la’o tiha ona entre Embaixada Timor-Leste iha Brunei no ajénsia sira iha Brunei, nune’e prosesu ba oin sei hein informasaun detallu molok realiza rekrutamentu ba traballadór sira.
Jornalista : Antónia Gusmão
Editora : Julia Chatarina
