BOBONARO, 08 abríl 2024 (TATOLI)-Padre Pároku hosi Parókia Nossa Senhora Imaculada da Conceição, postu administrativu Bobonaro, Padre Ernesto Barreto, husu sarani sira atu luta hamutuk hodi hakotu transmisAun virus Human Imonodeficiency Virus Aquired Immune Deficiency Sindrome (HIV/AIDS), tanba kada tinan númeru kazu ba moras ne’e kontinua rejista aas iha munisípiu Bobonaro.
Amu Pároku hato’o kestaun ne’e durante halo enkontru dahuluk ho Prezidente Autoridade Munisipál Bobonaro, Alexandrino Pires, iha salaun enkontru administrasaun postu administrativu Bobonaro, segunda ne’e.
Notísia relevante: Saúde Bobonaro deteta ema 118 afeta HIV/AIDS
Amu Pároku konsidera sériu iha munisípiu Bobonaro tanba daudaun ne’e ameasa boot tebes ba ema hotu, númeru HIV/AIDS aas tebes.
“Kuidadu, tinan lima ha’u servisu hanesan Pároku Maliana, ha’u hatene oinsá rede sira-ne’e involve sira nia-aan, fasil de’it nia simu o, depois fila, nia mensajen parabéns tanba o, ha’u-nia membru ona. Ne’e duni ba hirak-ne’ebé toman see isin lolon, kuidadu ba buat sira-ne’e, tanba ne’e ameasa ba vida, la’ós de’it o, maibé família no ba ema hotu-hotu, favor hakotu ona korrente aat ida-ne’e,” Padre Pároku ne’e fó hanoin.
Bibi-atan ne’e mós preokupa konaba sirkulasaun ai-moruk herbal ne’ebé ema fa’an iha mídia sosiál.
“Hemu dehan halo bootka kiik, halo ita forsa, maibé afinál ne’e ai-moruk ladi’ak, hau ko’alia katak ne’e perigu ba ita-nia vida, favór kuidadu, tanba se lae ita la’o sala dalan ona,” Padre ne’e hatutan.
Prezidente Autoridade Munisipál Bobonaro, Alexandrino Pires, konkorda ho prekupasaun parte Igreja nian tanba dadus hosi Ministériu Saúde hatudu katak munisípiu Bobonaro okupa númeru dahuluk kazu HIV/AIDS rejista aas liu iha Timor-Leste.
“Iha semana liubá, ha’u halo enkontru boot ida iha Novo Turizmu Dili, númeru ne’ebé boot liu mak munisípiu Bobonaro, Dili lakon ho ita. Ita iha totál kazu 200-resin, ita triste, ne’e ameasa boot mai Ita,” nia hateten.
Atu redús kazu ne’e, Alexandrino Pires, apela ba komunidade liuliu joven sira iha munisípiu Bobonaro atu hapara ona ransu livre, halo relasaun seksuál arbiru no labele halo tatoo iha isin-lolon.
“Se la’e ita bele mate hotu, tanba agora labarik ki’ik sira lahatene buat ida mós mate, tán de’it nia inan-aman mak halo, ikus nia mak sai vítima, entaun ita presiza eduka idak-idak nia karáter hodi halakon tiha moras ne’e, tanba ita Bobonaro ne’e positivu HIV/AIDS, balun lakon tiha hosi tratamentu, halai ba rai li’ur no balun la’o livre hela iha hela ita-nia let,” nia akresenta.
Repezentante Xefe Sentru Saúde Komunitária, Postu Administrativu Bobonaro, António Virgas Vicente, hateten atu prevene transmissun virus HIV/AIDS pesoál saúde sira Kontinua sensibiliza informasaun ba komunidade sira loron loron.
“Ami iha programa vizita suku ne’e nafatin, fó hanoin ba komunidade sira atu hadook-aan hosi moras ne’e, tanba ita munisípiu Bobonaro rejista kazu HIV/AIDS aas tebes,” nia tenik.
Enkuantu virus HIV/AIDS hadaet liuhosi relasaun seksuál, uza lamina hamutuk ho pasiente HIV/AIDS, kontaktu direita ho kanek pasiente HIV, daun sona, doasaun raan no inan isin rua partu bele hada’et ba oan, bainhira inan ida kona moras HIV.
Notísia relevante: Saúde Bobonaro lakon kontaktu ho pasiente HIV/AIDS na’in-20
Jornalista: Sérgio da Cruz
Editór: Evaristo Soares Martins
