PM Xanana husu empreza Telemor hadi’a koneksaun

DILI, 08 abríl 2024 (TATOLI)—Primeiru-Ministru (PM), Kay Rala Xanana Gusmão, hala’o enkontru ho Chief Executive Officer (CEO) Viettel Timor, Tran Van, hodi hatene programa no servisu sira ne’ebé empreza telekomunikasaun ne’e halo durante-ne’e.

“Ami kontente tebes bele mai hasoru Primeiru-Ministru hodi hato’o relatóriu serbisu Telemor nian, nune’e mós ho ami-nia servisu iha dijitalizasaun no teknolojia, ami mós ko’alia kona-ba planu Telemor nian ba tinan oin. Primeiru-Ministru hateten katak Telemor tenke hadi’a nia koneksaun di’ak liután hodi lori nia koneksaun no fasilidade dijitál bá to’o komunidade iha baze iha territoriu hotu,” Tran Van haktuir hafoin hasoru malu ho PM Xanana, iha Palásiu Governu, segunda ne’e.

Notísia relevante : Telemor hakarak Timor-Leste sai ponte ba divizaun dijitál

Nia dehan, daudaun ne’e populasaun Timor-Leste 96% mak asesu ona koneksaun Telemor nian, enkuantu Telemor foku hela hodi implementa atividade rua mak hanesan instalasaun tower iha territóriu tomak, inklui halo koneksaun bá Internasionál.

“Loos duni katak ami simu preokupasaun balun husi públiku kona-ba koneksaun internet, maibé ida-ne’e tanba ami hola filafali husi Indonézia nune’e bainhira sira-nia internet down nune’e iha ne’e mós sei afeta,” nia klarifika.

Tran Van iha esperansa katak Governu nia projetu hanesan fibra ótika nian ne’ebé sei mai bele hadi’a liután liña koneksaun iha Timor-Leste.

Jornalista     : Antónia Gusmão

Editora          : Julia Chatarina