COVALIMA, 08 Abríl 2024 (TATOLI) – Konsellu Munisipál Kombatente Libertasaun Nasionál (CMCLN, sigla portugés) Covalima rejista, entre 05 Marsu no 03 Abríl, veteranu no mártir nia oan hamutuk 210 mak inksreve ona hodi asesu ba vaga bolsa estudu iha tinan ne’e.
Husi númeru 210 ne’e – na’in-19 iha primeiru siklu ensinu báziku, na’in-hitu iha segundu no terseiru siklu, na’in-50 iha ensinu sekundáriu, na’in-131 iha ensinu superiór no tolu bá ensinu superiór iha rai-li’ur.
“Ita taka ona atendimentu ba veteranu no mártir nia oan ne’ebé atu asesu ba bolsa estudu” , Sekretáriu-Ezekutiva CMCLN, Manuel Henrique Barreto ‘Fitun’, hateten iha Tabakolot, ohin.
Nia salienta katak CMCLN simu orientasaun husi Ministériu Asuntu Kombatente Libertasaun Nasionál hodi atribui, kada tinan, bolsa estudu ba kombatente no mártir nia oan sira. Atribuisaun bolsa estudu ne’e bazeia ba dekretu-lei númeru 8/2009, 15 janeiru, kona-ba rejime atribuisaun bolsa estudu ba kombatente no mártir libertasaun nasionál nia oan sira.
Governu oferese vaga ba bolsa estudu ba veteranu no mártir nia ona ne’ebé ho grau 8 a 15 iha kada munisípiu hamutuk 105, ne’ebé destina ba estudante primeiru siklu na’in-lima, segundu no terseiru siklu na’in-15, ensinu sekundáriu 25, ensinu superiór 50 no bá universidade iha estranjeiru lima. Enkuantu iha Covalima númeru ema ne’ebé atu asesu ba bolsa sa’e ba 210.
“Hafoin finaliza halo rejistu, ekipa sei submete dadus hirak ne’e ba iha nasionál atu halo verifikasaun hodi fó sai nia rezultadu sé mak pasa no sé mak la pasa”, Manuel Barreto ‘Fitun’ realsa.
Veteranu João da Costa reforsa katak veteranu no mártir nia oan sira tenke aproveita oportunidade atu kontinua luta ne’ebé mak inan-aman halo mak tenke liuhusi edukasaun, tanba nia mak xave ba dezenvolvimentu nasaun.
“Uluk ami luta atu buka ukun aan, maibé ohin ita-boot sira luta atu halo dezenvolvimentu liuhusi setór edukasaun. Sé ita-boot sira la aproveita, sé mak atu hatutan ami-nia luta ”, nia hateten.
Notísia relevante: Konsellu Veteranu loke inskrisaun ba kombatente nia oan sira asesu ba bolsa estudu
Jornalista: Celestina Teles
Editora: Maria Auxiliadora
