BOBONARO, 09 abríl 2024 (TATOLI) – Prezidente Autoridade Munisípiu (PAM) Bobonaro, Alexandrino Pires, segunda ne’e halo vizita traballu dahuluk ba postu administrativu Bobonaro hodi halo enkontru ho autoridade postu, funsionariu públiku no líder komunitária sira hosi suku 18.
Enkontru ne’e ho objetivu atu rona direita preokupasaun povu nian no kondisaun reál ne’ebé durante ne’e povu postu administrativu Bobonaro enfrenta hanesan; bee-moos, estrada no eletrisidade.
Administradór postu administrativu Bobonaro,Tomás Henriques, informa povu moris dependénsia ba vida agrikultór no durante ne’e iha suku sia mak seidauk asesu enerjia elétrika.
“Ita iha aldeia 20 mak seidauk asesu eletrisidade, suku Leber aldeia tolu. Ida-ne’e tama ona ba prosesu tenderizasaun (konkursu públiku), suku Aiasa aldeia tolu, Lour aldeia tolu, suku Mali-Ubu aldeia ida, Colimau aldeia ida, suku Ilat-laun aldeia ida, Atuaben aldeia ida, Soilesu aldeia rua, Tebabui aldeia rua. Ne’e tuir informasaun instalasaun ne’e komunidade mak dada rasik de’it, fiu ne’e la’o hosi ai-leten ida ba ai-leten seluk,” nia hateten.
Problema iha setór saúde
Liga ba setór saúde, Repezentante Xefe Sentru Saúde Komunitária Postu Administrativu Bobonaro, Antonio Viegas Vicente, hateten problema ne’ebe sira hasoru maka laiha ambulánsia iha sentru saúde Kakanea, no laiha kombustível ba karreta ambulánsia atu halo operasaun tula pasiente sira ba Maliana.
“Ami suku 18, maibé karerta rua de’it, ida fali aat tiha ona, ida ami uza hela, maibé la sufisiente, depois mina laiha, pasiente ruma ami refere ba Maliana loron ida dala tolu ne’ebé sira ense litru 30, dalaruma fulan ida mós lato’o tanba ita haree kondisaun estrada Bobonaro ba Maliana ne’e foin lalais pasiente iha Carabau ou Lourba sira rasik atu ense mina, maibé ami la autoriza,” nia hatoo ba PAM Bobonaro.
Problema iha setór edukasaun
Iha setór Edukasaun, Diretor Ensinu Báziku Sentrál Dom Caileto, Bobonaro, Daniel da Cruz, husu ba parte kompetente atu reabilita eskola antigu EBC Dom Caileto, tanba kondisaun infraestrutura ladiak no aat grave.
“Sala la sufisiente bee ami uza fali edifísiu Cavalaria 5 hodi halo prosesu aprendizajen hosi primeiru ba to’o segundu siklu,” nia dehan.
Kona-ba problema merenda eskolár iha EBC Dom Caileto to’o agora seidauk implementa ba loron efetivu (9) fulan abríl nian.
Xefe suku Aiasa, Juvinal Moniz Martins Marques, hateten durante fulan tolu ona manorin balu iha Ensinu Báziku Filiál (EBF) Odelgomo abandona estudante sira.
“Ha’u fó ona informasaun ba diretor edukasasaun, maibé to’o agora seidauk nia ekipa seidauk tún, tanba ne’e mak ha’u rekomenda atu halo koordasaun ho parte edukasaun atubele tún lalais,” Xefe suku Aiasa ne’e hateten.
Hafoin rona preokupasaun hirak-ne’e, Prezidente Autoridade Munisípiu Bobonaro, Alexandrino Pires, promete sei relata problema ne’e ba parte kompetente hodi buka solusaun.
“Ita bele tau iha planu orsamentu, maibé labele rezolve hotu, tanba depende ba KROP (Komisaun Revizaun Orsamentu nível Polítika) no Parlamentu Nasionál, ne’ebé la signifika planu ne’e ita bele hadi’a agora, maibé ha’u loby hela membru governu sira, atu apoia osan ne’ebé iha planu ba munisípiu Bobonaro,” nia katak.
Prezidente Autoridade Munisípiu Bobonaro ne’e hasoru ona Ministra Saúde, Élia de Jesus, atu apoia ambulánsia unidade rua ba munisípiu Bobonaro.
“Kareta rua ne’e, ministra dehan fulan-agostu to’o ona mai, ne’ebé ida ita sei fó ba sentru saúde Kakanea, ida fali mak ita sei haree sentru Saúde ne’ebé presiza ita haruka ba,” nia katak.
Kona-ba problema reabilitasaun eskola Antigu Dom Caileto, Prezidente Autoridade Munisipál hatene tinan ne’e laiha orsamentu, maibé sei tau fali iha planu orsamentu 2025.
Kona-ba kestaun manorin abandona sala aula, nia husu ba líder komunitária sira atu aprezenta ba Diresaun Servisu Munisipál Bobonaro atubele hola medida ruma.
“Imi hakarak servisu, buka servisu hela, maibé bainhira ita fasilita tiha imi, imi lakohi servisu, ko’a nia saláriu, sé la kumpri suspende nia saláriu tanba lei ko’alia klaru tiha ona,” nia subliña.
Enkuantu postu administrativu Bobonaro iha suku 18, aldeia 63 ho totál populasaun 33,990, komposta hosi mane 17,162 no feto 16,828 ho totál uma-kain 7000.
Notísia relevante: PAM Bobonaro husu pesoál saúde foun 110 serbí pasiente ho responsabilidade
Jornalista : Sérgio da Cruz
Editór : Evaristo Soares Martins
