iklan

BOBONARO, HEADLINE, MUNISÍPIU

PAM Bobonaro husu pesoál saúde foun 110 serbí pasiente ho responsabilidade

PAM Bobonaro husu pesoál saúde foun 110 serbí pasiente ho responsabilidade

Prezidente Autoridade Munisipál Bobonaro, Alexandrino Pires, ko'alia hela ho pesoál saúde foun sira. Imajen Tatoli/Sérgio da Cruz.

BOBONARO, 18 marsu 2024 (TATOLI)-Prezidente Autoridade Munisipál (PAM) Munisípiu Bobonaro, Alexandrino Pires, husu ba pesoál saúde foun na’in-110 atu serbí pasiente ho fuan no domin, tanba kna’ar profisionál ne’e nu’udar vokasaun ida-ne’ebé Maromak fó atu salva ema-nia vida.

Alexandrino Pires, hato’o apelu ne’e iha nia intervensaun ba serimónia entrega pesoál saúde na’in-82 ba Diresaun Servisu Munisipál Saúde, Autoridade Munisípiu Bobonaro no na’in-28 ba Hospital Referál Maliana.

Notísia Relevante:Saúde Bobonaro propoin projetu hitu iha PDIM 2024

Nia konsidera pesoál saúde hirak-ne’e atu salva komunidade Bobonaro nia vida, ema hotu atu mate ka moris iha ita-boot sira-nia liman.

“Ne’ebé hau husu imi servisu ho profisionál no kualidade no importante liu serbí ho fuan no domin, tenke ser hatudu imi-nia votade, espíritu ba inan-aman sira-ne’ebé iha situasaun difisil nia laran, tanba sira mai atu buka tratamentu, ne’ebé presiza atende sira hanesan atende ita-nia inan-aman,” nia hateten iha edifísiu Servisu Munisipál Saúde, munisípiu Bobonaro, segunda ne’e.

Atu fó atendimentu saúde ba komunidade ho masimu, Prezidente Autoridade dejan, daudaun ne’e parte prepara hela dokumentu lubuk ida, oinsá atu prepara planu hodi bele kria kondisaun dignu ba profisionál saúde liuliu sira-ne’ebé hela iha área rurál.

Nia subliña, iha tempu badak liuhosi atividade vizita postu no suku sira, nia parte hamutuk ho ekipa Ajénsia Fiskalizasaun sei fiskaliza servisu profsionál Saúde sira nia iha fasillidade Saúde sira ne’ebé eziste iha munisípiu Bobonaro.

“Ha’u atu haree funsionáriu sira servisu duni ka lae, tanba lei orienta ona funsionáriu sira-ne’ebé lakohi halo nia servisu, lei hateten iha dalan ne’ebé atu koloka nia, lae sira barak mak abandona servisu hela ida de’it mak iha, lisensa mak barak liu, ne’ebé ha’u hateten lisensa tuir regra Funsaun Públika nian, labele abuza sasan sira-ne’e, la kumpre fila ba uma, tanba ema rihun hira mak iha liur buka hela servisu,” nia dehan.

Diretór Servisu Munisipál Saúde, Autoridade Munisipál Bobonaro, Gíl Bernardo Vivente, agradese ba IX Governu ne’ebé mak halo ona rekrutamentu ba pesoál saúde hirak-ne’e, tanba durante ne’e fasilidade saúde barak mak menus no laiha rekursu umanu.

“Agora ita bele koloka ona pesoál saúde ba fasillidade saúde sira iha munisípiu Bobonaro, ha’u hanoin ida-ne’e bele responde ona prekupasaun sira-ne’ebé enfrenta, tanba fatin mamuk laiha ona, hotu-hotu kuaze prienxe ona, ne’ebé ha’u husu ba komunidade hotu ne’ebé atu mai vizita fasillidade, hodi hetan atendimentu,” nia katak.

Enkuantu Munisípiu Bobonaro iha Sentru Saúde hitu, Postu Saúde 30 no Hospital Referál ida mak durante ne’e halo atendimentu saúde primária no sekundária ba komunidade sira.

Notísia relevante: Diretór Saúde Bobonaro la tolera pesoál saúde abandona serbisu

Jornalista: Sérgio da Cruz
Editór: Evaristo Soares Martins

iklan
iklan

Leave a Reply

iklan
error: Content is protected !!