iklan

BOBONARO, HEADLINE, MUNISÍPIU, SAÚDE

Diretór Saúde Bobonaro la tolera pesoál saúde abandona serbisu

Diretór Saúde Bobonaro la tolera pesoál saúde abandona serbisu

Diretór Servisu Munisipál Saúde Bobonaro, Gil Bernardo Vicente. Imajen Tatoli/Sérgio da Cruz.

BOBONARO, 09 fevereiru 2024 (TATOLI) – Diretór Servisu Munisipál Saúde (SMS) Autoridade Munisipál Bobonaro, Gil Bernardo Vicente, sei la tolera pesoál Saúde sira-ne’ebé abandona fasilidade saúde iha oras servisu.

Nia hato’o asuntu refere tanba durante ne’e observa profisionál saúde balun kada sesta, fim de semana abandona fasilidade saúde, maske oras servisu la’o hela no iha mós rezidensia ne’ebé estadu harii.

Notisia relevante: Servisu Saúde Bobonaro enfrenta problema kombustível

“Sira iha rezidénsia, halo favór labele fila, tanba iha Bobonaro ha’u ba tuku 14:00 de’it ema laiha, depois sesta ho sábadu fila hotu uma ida, ne’e ita hatudu imajen ladi’ak, ida-ne’e ba oin ha’u la tolera. Sé mak servisu laloos ita sei halo mudansa transfere nia ba Lolotoe no fatin seluk, agora ita tenke uza fuan ho lei oituan atubele hadi’ak servisu ba oin ho di’ak,” nia hateten iha salaun administrasaun postu Maliana, sesta ne’e.
Biban ne’e reponsavél másimu Saúde Bobonaro ne’e apela ba profesionál saúde sira atu kria oráriu hodi halo vizita kada semana ba postu saúde sira-ne’ebé taka provizóriu.

Nia hatutan, daudaun ne’e iha tempu udan komunidade sira presiza tebes tulun atendimentu saúde.

“Maske ita hasoru hela problema menus rekursu umanu, maibe nu’udar profesionál ita tenke ba halo atendimentu ho fuan no domin ba ita-nia komunidade sira, tanba sira tau fiar ba ita, se la ita, sé mak bele ajuda sira,” nia subliña.

Nia dehan, iha tempu badak Diresaun Servisu Munisipál Saúde sei koordena ho dirijente Hospital Referál Maliana atu estabelese portavós informasaun hodi kombate informasaun hoax ne’ebé ema deskoñesidu lansa ligadu ho atendimentu Saúde.

Nune’e mós sei kria pájina Facebook Servisu Saúde Munisipál Bobonaro hodi publika atividade no servisu saúde ne’ebé hala’o kada loron, nune’e komunidade mos bele hatene atendimentu saúde la’o hela.

Tuir dadus Munisípiu Bobonaro iha sentru saúde hitu, ospitál referál ida no totál pesoál saúde hamutuk 243, komposta hosi permanente 214 no  kontratadu 29.

Notísia relevante: Estoke ai-moruk esensiál iha Sentru Saúde Bobonaro sufisiente

Jornalista: Sérgio da Cruz
Editór: Evaristo Soares Martins

iklan
iklan

Leave a Reply

iklan
error: Content is protected !!