Estoke ai-moruk esensiál iha Sentru Saúde Bobonaro sufisiente
BOBONARO, 02 fevreiru 2024 (TATOLI)-Estoke ai-moruk esensiál iha farmasia Sentru Saúde Komunitária Postu Administrativu Bobonaro, munisípiu Bobonaro, sufisiente hela atu halo atendimentu ba komunidade ne’ebé moras.
Notísia Relevante:Sentru Saúde Bobonaro menus rekursu umanu
“Ita-nia aimoruk esensiál kona-bá tratamentu bainbain sufisiente hela, tanba ne’e apela ba komunidade katak ita-nia ai-moruk iha hela, lalika fiar rumoris ne’ebé espalla hela dehan ai-moruk laiha, ita-nia ai-moruk iha hela, mai de’it,” Xefe sentru saúde komunitária, postu administrativu Bobonaro, Domingos Mesquita, informa ba Jornalista sira iha Maliana, sesta ne’e.
Nia haktuir, ai-moruk Diclofhenad no ekipamentu ba kazu emerjensia, dezde fulan dezembru tinan kotuk to’o agora kontinua estoke out, nune’e difikulta sira atu halo atendimentu ba pasiente ne’ebé mai ho kondisaun kanek.
Daudaun ne’e atendimentu saúde iha sentru saúde rasik no postu saúde Leber no Sibuni kontinua la’o normál no postu saúde Lour mak sei kontinua taka provizóriu.
Jerente sentru saúde ne’e dehan, hafoin pesoál saúde sira kontratu termina iha 31 dezembru 2023, nia parte hetan orientasaun hosi Servisu Saúde Munisipál atu kria oráriu hodi halo vizita ba suku Lour kada semana, maibé la konsege tanba hasoru hela difikuldade balun.
“Ita haree fali ba klima, estrada ladi’ak, depois ita-nia problema ida mak kombustível laiha to’o agora, sira foin daduk fó fali mai iha 60 litrus de’it, entaun ami labele kobre lori halo atividade, atu uza motorizada lori halo Klínika Movél mos labele tanba mina ne’e ami prepara de’it ba atu reponsde kazu emerjénsia sira lori ba Maliana.”
Entertantu sentru saúde komunitária Bobonaro halo atendimentu ba komunidade sira hosi suku sira hanesan Molop, Subuni, Lour, Leber, Tapo, Oe-Leu, Mali-Lait no Suku Bobonaro Vila.
Notísia relevante: Sentru Saúde Balibo laiha estoke kombustível ba Ambulánsia
Jornalista: Sérgio da Cruz
Editór: Evaristo Soares Martins
