Sentru Saúde Bobonaro menus rekursu umanu
BOBONARO, 10 agostu 2023 (TATOLI) – Sentru Saúde Komunitária, postu administrativu Bobonaro, munisípiu Bobonaro, durante ne’e enfrenta hela problema menus rekursu umanu hanesan médiku, parteira no analista laboratóriu.
Xefe sentru saúde Bobonaro, Domingos Mesquita da Silva, hateten totál pesoál saúde iha SKS mak ne’e hanesan médiku na’in-rua, emfermeiru na’in-sia, parteira permanente ida no kontratadu na’in-haat no farmasista ida.
Notísia relevante: Profisionál saúde Bobonaro tuir formasaun planeamentu familiár
“Ami-nia problema maka menus rekursu umanu, hanesan médiku la sufisiente atu atende komunidade suku sia, tanba tuir loloos iha sentru ne’e minimál médiku na’in-haat ka lima, parteira mós menus, tanba permanente ida de’it, analista laiha, dalaruma atu hasai raan halo ezaminasaun laboratóriu ami kansela, tanba laiha rekursu, se presiza loos entaun ami haruka ba hasai fali iha Maliana,” nia informa ba Tatoli, iha Bobonaro, kinta ne’e.
Jerente SKS ne’e haklaken, alende enfrenta problema menus rekursu umanu, hasoru mós problema kona-bá espasu sala atendimentu ba pasiente sira la sufisiente.
Nia dehan, problema ne’e difikulta tebes ba prosesu atendimentu, tanba sala ida bele akumula programa rua ka tolu.
“Ha’u fó ezemplu ba konsultóriu, ne’e tenke iha privasi ida no konsulta jerál ida, agora ami atende hamutuk de’it, loloos ne’e fatin ne’e tenke ketak-ketak, ami-nia sala iha 10, maibé sala ida ami tenke tau programa ida oin rua, tuir kritéria loloos ne’e sala ida programa ida, atu nune’e ita bele fó espasu ba pasiente sira,” nia katak.
Xefe sentru ne’e komnirma kona-bá problema fatin la sufisiente hato’o ona ba Ministériu Saúde no Komisaun Funsaun Públika atu aumenta rekursu umanu.
“Ami husu nafatin Governu foun atu hare problema ne’e, atu nune’e ita bele mellora atendimentu saúde ba komunidade sira,” nia sujere.
Entretantu durante ne’e sentru saúde Bobonaro halo atendimentu ba komunidade sira hosi suku sia hanesan; Molop, Sibuni, Lour, Leber, Tapo, Oe-leu, Mali-lait no suku Bobonaro Vila.
Notísia relevante: MS inaugura infraestrutura saúde neen iha Bobonaro
Jornálista : Sérgio da Cruz
Editór : Evaristo Soares Martins
