MALIANA, 05 maiu 2023 (TATOLI)-Ministra Saúde, Odete Maria Freitas Belo, kinta ne’e ofisialmente inaugura infraestrutrura saúde hamutuk unidade neen iha munisípiu Bobonaro.
Infraestrutura unidade neen komposta hosi sala pediatria ho sala sirurjia iha Hospital Referál Maliana no postu saúde Da-Udu, Manapa, Leber no postu saúde Dilai.
Infraestrutura hirak-ne’e konstrui ho Orsamentu Jerál Estadu (OJE) ne’ebé Parlamentu Nasional aprova entre tinan 2021 no 2022.
Ministra Saúde, Odete Maria Freitas Belo, hateten, estabelesimentu infraestrutrura hirak-ne’e ne’e nu’udar esforsu governu nian atu responde ba nesesidade ne’ebé komunidade sira presiza nune’e bele hetan tratamentu saúde iha fatin ne’ebé dignu.
Nia hatutan, fasilidade no infraestrutura saúde natoon ona, maibé husu ba direitór opsitál no postu saúde sira atu hadi’ak jestaun ba ai-moruk no kuida ekipamentu médiku sira nune’e pasiente sira labele halerik beibeik.
Notísia relevante: MS inaugura fasilidade Covid-19 tolu iha HRM
“Agora ita iha sala ba labarik nian no sala operasaun nian ne’ebé mak osipitál ida-ne’e nesesita tebes tanba sira-nia espasu ne’ebé la sufisiente ikus mai ita bele iha. Kona-bá oinsá atu jere espasu, fatin sira-ne’e kabe ba diretór ezekutivu ho ninia konsellu, médiku, enfermeiru,” nia hateten.
Ministra saúde agradese emprezáriu Bobonaro oan ne’ebé ho laran luak no votande konsege finaliza obra ne’e ho susesu, tanba esforsu hirak-ne’e Governu mesak sei bele halo buat ida liuliu atu prepara kondisaun no haluan espasu ba komunidade sira.
Governante ne’e subliña, durante ne’e iha infraestrutua saúde barak mak governu halo ona, maibé iha buat balu seidauk kompletu, tanba ne’e Ministériu Saúde sei kontinua esforsu no koko atu la’o ba oin hodi kompleta fasilidade sira hanesan ekipamentu médiku no ai-moruk hahú hosi postu saúde to’o ospitál referál.
Prezidente Autoridade Munisípiu Bobonaro Interino, João de Fátima do Carmo, agradese Ministériu saúde ne’ebé tau ona prioridade hodi kontrui Infraestrutura hirak-ne’e, maski durante ne’e hasoru difikuldade oinoin.
“Ita hetan oan sala sirurjia no sala pediatria no postu saúde haat ne’e, bele responde ona nesesidade ami-nia komunidade sira-nia ne’ebé mak dala barak labele hetan atendimentu di’ak to’o iha sentru, ho ida-ne’e bele ona hakmaan sira,” João dehan.
Sala lediatria ne’e hahú konstrui iha área projetu 460,32 m², hahú iha loron 26 fulan-agosto tinan 2021 no finaliza iha loron 02 fulan-dezembru tinan kotuk ne’ebé ezekuta hosi empreza Franternity Unipesoál Lda ho totál orsamentu $303,275,50.
Enkuantu sala sirurjia konstrui iha área projetu 455,12 m², ne’ebé hahú iha loron 09 fulan-setembru 2021 no finaliza iha loron 02 fulan-dezembru tinan 2022, ezekuta hosi empreza Hugo Amor Unipesoál Lda ho totál orsamentu $268,612,94.
Notísia relevante: Vise MS inaugura sistema purifikasaun Bee LMS iha ospitál Maliana
Jornalista: Sérgio da Cruz
Editór: Evaristo Soares Martins
