iklan

BOBONARO, HEADLINE, MUNISÍPIU, SAÚDE

Sentru Saúde Balibo laiha estoke kombustível ba Ambulánsia

Sentru Saúde Balibo laiha estoke kombustível ba Ambulánsia

Xefe Sentru Saúde Komunitaria Postu Administrativu Balibo, Doutór Napoleão Marques. Imajen Tatoli/ Sérgio da Cruz.

BALIBO, 29 janeiru 2024 (TATOLI)-Sentru Saúde Komunitária Postu Administrativu Balibo,nMunisípiu Bobonaro, durante fulan ida ona enfrenta problema laiha estoke  kombustível atu enxe ba karreta Ambulánsia hodi tula pasiente sira-ne’ebé presiza asistensia médika ho urjénsia.

“Ami laiha kombustível enxe ba karreta ambulánsia no transporte sira durante fulan ida ona,” Xefe Sentru Saúde Balibo, Doutór Napoleão Marques, informa ba jornalista sira iha kna’ar fatin, segunda ne’e.

Jestór Sentru Saúde Komunitária ne’e hato’o pedidu ba Diresaun Servisu Munisipál Saúde Munisípiu Bobonaro no komfirma katak kombustível iha nasionál estoke out.

Ba kestaun ne’e, Doutór Napoleao afirma, bainhira akontese kazu emerjénsia ruma obrigatóriu nia rasik no mediku sira hola inisiativa hasai osan sosa mina enxe ba Ambulánsia atubele ba atende pasiente sira-ne’ebé moras liuliu inan isin-rua sira.

Jestór Sentru saúde ne’e argumenta, asaun refere sira halo ho intensaun redús kazu mortalidade inan ho oan, tanb kna’ar pesoál saúde nia mak serbí ho fuan no domin hodi salva ema-nia vida.

“Ha’u iha prinsípiu ida katak ha’u hetan kargu xefia ho osan $310, osan ne’e ha’u rai hela hodi suporta, kazu emerjénsia ruma, tanba ita hein Governu ne’e difisil, entaun ha’u kontaktu ho sira fa’an mina ne’e depois ba enxe, hotu mak ha’u rasik ba selu, ha’u hanesan jerasaun foun, no ha’u sai jestór ne’e atu suporta kolega sira iha kualkér programa, tanba komunidade presiza ita-nia tulun, se ita la hasai osan, ita labele salva komunidade sira.”

Nia hatutan, dalaruma hasoru situasaun defisil liu, família pasiente balu deside sosa mina enxe ba karreta ambulánsia hodi tranporta pasiente ho emerjénsia ba Ospitál Referál Maliana.

Nia konsidera problema refere difukulta tebes sira atu halo atendimentu urjénsia hodi salva komunidade nia vida.

“Iha semana liubá labarik mai ho kondisaun grave tebes, ha’u-nia kolega doutór hasai osan enxe mina ba ambulánsia, to’o iha dalan labarik fila, maibé nmai ho kondisaun ne’ebé grave, tanba komunidade sira laiha koñesimentu,bdepois ita laiha oksijéniu atu atende kazu grave,” nia hateten.

Administradór postu administrativu Balibo, Amilcar Tavares, louva no konsidera asaun ne’ebé Xefe Sentru Saúde no medíku sira halo eroíku no kontribui tebes atu salva komunidade nia vida.

“Sira ba ukun ho fuan la’ós ho kakutak, sé kakutak de’it ema mate, ne’ebé parabéns ba inisiativa di’ak ne’e, sé karik nia la hasai osan, ema bele mate, entaun sai jestór salva lai ema depois mak ita haree osan ne’e, depois mak ita-nia estadu re-embolsa,” Amilcar dehan.

Iha fulan ne’e Sentru Saúde Komunitária Postu administrativu Balibo rejista kazu Infeksaun Respiratóriu Aguda aas liu ho totál ema na’in-600, diarreia 300-resin no moras kulit 110.

Jornalista: Sérgio da Cruz

Editór: Evaristo Soares Martins

iklan
iklan

Leave a Reply

iklan
error: Content is protected !!