BOBONARO, 06 fevereiru 2024 (TATOLI) – Diresaun Servisu Munisipál Saúde Bobonaro, daudaun ne’e enfrenta hela problema kombustível no situasaun ne’e difikulta tebes operasaun karreta ambulánsia sira iha sentru saúde atu halo atendimentu ba kazu emerjénsia, liuliu inan isin-rua atu partu.
Diretór Servisu Munisipál Saúde Bobonaro, João Cardoso, esplika Ministériu Saúde apoia ona kombustível litru 600 hodi distribui ba sentru saúde neen ne’ebé eziste iha munisípiu Bobonaro, maibé agora kuaze estoke mamuk.
Notísia relevante: Sentru Saúde Balibo laiha estoke kombustível ba Ambulánsia
“Ita sei hasoru problema oituan, agora daudaun ita estoke out ba mina (kombustível), inkluindu orsamentu laiha, tanba prosesu ne’e sei impede hela, tanba hein diretór foun sira mai mak sasán sira-ne’e bele la’o ho di’ak,” nia hateten iha salaun administrasaun postu administrativu Maliana, tersa ne’e.
Nia Joao dehan, situasaun ne’e akontese tanba daudaun ne’e instituisaun Estadu hotu-hotu hasoru hela períodu tranzisaun lideransa nune’e ezekusaun orsamentu 2024 sei paradu.
Ba Kestaun ne’e, João Cardoso nafatin enkoraja responsável sentru saúde sira iha munisípiu Bobonaro atu buka meiu oinsá jere didi’ak idak-idak nia fasilidade saúde.
Enkuantu foin lalais ne’e Servisu Saúde Munisipál Bobonaro hetan ona tetu orsamentu tinan fiskál 2024 hosi Autoridade Munisípiu Bobonaro hamutuk $214,699.
Notísia relevante: Saúde Bobonaro propoin projetu hitu iha PDIM 2024
Jornalista: Sérgio da Cruz
Editór: Evaristo Soares Martins
