DILI, 09 abríl 2024 (TATOLI)—Primeiru-Ministru (PM), Kay Rala Xanana Gusmão hamutuk ho delegasaun, kuarta ne’e, halo viajen serbisu ba nasaun tolu hanesan Reinu Unidu, Gregu, no Itália, hahú 10 to’o 23 abríl, 2024 hodi partisipa reuniaun importante sira ne’ebé sei hametin kooperasaun bilaterál.
Vise-Ministru Asuntu Parlamentár, Adérito Hugo da Costa, hateten, PM Xanana iha Reinu Unidu sei hasoru malu ho poténsia legál sira ligadu ho fronteira marrítima no terrestre.
“Durante Xefe Governu laiha, delega hela ba Vise Primeiru-Ministru na’in-rua, sira na’in-rua rotativamente. Tanba Primeiru-Ministru nia vizita ne’e kuaze semana-tolu, entaun semana dahuluk Vise Primeiru-Ministru, Francisco Kalbuadi Lay, enkuantu semana tuir mak Vise Primeiru-Ministru, Mariano Assanami, hodi hein to’o Primeiru-Ministru filafali mai,” Adérito Hugo da Costa, informa hafoin reuniaun Konsellu Ministru, iha Palásiu Governu, tersa ne’e.
Notísia relevante : PM Xanana aranka ohin bá Suiça partisipa fórum ekonómiku mundiál
Deslokasaun Xefe Governu nian ne’e nu’udar vizita ofisiál, sei hala’o viajen uluk bá Reinu Unidu, to’o iha destinasaun iha loron 11 abríl. Tuir ajenda PM Xanana sei enkontru ho Konsellu Seniór kona-ba asuntu sira ne’ebé relasiona ho fronteira marrítima nian.
Iha loron 14 to’o 18 abríl, Xefe Governu reprezenta Prezidente Repúblika, José Ramos-Horta, sei partisipa iha konferénsia Oseanu ba dala-sia, iha Atenas, Gregu.
Nune’e, iha loron 18 abríl, Xefe Ezekutivu ne’e partisipa iha esposizasaun Arte Internasionál ba dala-60, ne’ebé hala’o iha Biennale de Venice-Italia.
Xefe Governu Xanana akompaña hosi, Sekretáriu Estadu Arte no Kultura, Jorge Soares Cristovão hamutuk ho Artista Timor-oan, Maria Madeira, sei hala’o lansamentu espozisaun arte konteporánea hosi tais Timór no filme dokumentáriu kona-ba feto Timor-Leste ne’ebé aprezenta iha Expoziasaun Internasionál Biennale de Venice-Itália.
Expozisaun ne’e rasik sei hala’o durante fulan-hitu, iha fulan-abríl to’o novembru 2024, sei partisipa husi nasaun 90, ne’ebé Timor-Leste hahú hala’o ona preparasaun másimu atu promove ninia obra arte konteporánea oin-oin.
Iha espozisaun ne’e, Timor-Leste sei aprezenta projetu istória feto ne’ebé prepara husi Artista, Maria Madeira ho tema “Kiss and Don’t Tell” (Rei, Mais Labele Ko’alia), ne’ebé apoia husi Kuradora, Natalie King ho ekipa produtor filme hosi Austrália, Artista Timor-oan, Alfeu Pereira no pintór sira husi Grupu Arte Moris.
Jornalista : Antónia Gusmão
Editora : Julia Chatarina
