DILI, 15 janeiru 2024—Primeiru-Ministru (PM), Kay Rala Xanana Gusmão, iha segunda ne’e, sei halo viajen bá nasaun Suiça hodi partisipa iha fórum ekonómiku mundiál ba dala-54 (The 54th Annual Meeting of The World Economic Forum), iha Davos-Klosters, hahú hosi loron 15 to’o 19 janeiru 2024.
Reuniaun annuál ne’e sei halibur entidade relevante sira hosi rejiaun hotu iha mundu atubele serbisu hamutuk iha prioridade haat ne’ebé iha interligasaun hanesan alkansa seguransa no kooperasaun iha mundu ne’ebé laiha unidade, intelijénsia artifisiál nu’udár forsa prinsipál ba dezenvolvimentu ekonomia no sosiedade, kria kresimentu no empregu iha era foun no estratejia longu prazu ba klimátika, natureza ho enerjia.
Programa inovativu ne’e sei dezenvolve bazeia ba reuniaun ne’ebé realiza antes ona, ho nia senáriu ba sesaun sira tuir programa pilár importante haat ne’e.
Notísia relevante : Forúm Internasionál Business promove debate hodi kria oportunidade
Prioritizasaun ba temátika haat ne’e tanba ohin loron ema, sosiedade no empreza sira enfrenta realidade transforasaun mundiál ho problema barak ne’ebé akontese hanesan violénsia trájiku iha médiu oriente nu’udár akontesimentu reál, mudansa profunda estruturál hahú hosi jeoekonomia, mudansa klimátika to’o inteleijénsia artifisiál.
Situasaun ne’e ezije liu atu dezenvolve plataforma no diálogu, parseria ne’ebé forte, estabelese kuadru polítiku forte, implementasaun teknolojia efikas atubele lori benefísiu direta no bele implemeta iha sosiedade iha kurtu prazu.
Sesaun annuál sei sai nu’udár fórum organizasaun internasionál ba kooperasaun públiku-privada, hanesan plataforma ba diálogu inkluzivu ba tempu naruk.
Viajen Xefe Governu ne’e sei akompaña hosi Ministru Negósiu Estranjeiru no Kooperasaun, Bendito dos Santos Freitas. Delegasaun ne’e sei fila hikas mai Timor iha loron 20 janeiru 2024.
(TATOLI)
