Forúm Internasionál Business promove debate hodi kria oportunidade
DILI, 23 novembru 2023 (TATOLI) – Primeiru-Ministru, Kay Rala Xanana Gusmão,, dehan Forúm Internasionál Business importante hodi promove debate no diskusaunn sira ho objetivu atu kria kualker oportunidade negósiu.
“Fórum Emprezariál ida-ne’e promove debate kona-ba ideia ho solusaun sira ne’ebé, nu’udar ita-boot sira hatene, hanesan primeiru passu ba kriasaun kualker oportunidade negósiu ho empreendedorizmu”, Xanana hateten iha nia intervensaun iha Salaun GMN Bebora, ohin.
Iha forúm internasionál refere, loke hosi Xefe Governu no partisipa hosi emprezáriu hosi nasaun hamutuk 28 iha Ázia no Europa, iha forúm ne’e okore durante loron tolu iha Timor-Leste.
Iha Xanana nia diskursu, apresia no fó onra boot ida ba emprezáriu hotu internasionál no nasionál tanba bele marka prezensa iha Forúm Empresarial Internacional Timor-Leste.
Nia husu atu ko’alia kona-ba oportunidade emprezariál la’ós de’it ba Timor-Leste, maibé ba ita-nia rejiaun tomak, ho hanoin katak Timor-Leste kria daudaun kondisaun atu sai hanesan parseiru ekonómiku ida ne’ebé ativu no dinámiku tebes, liuliu iha ámbitu adezaun ba ASEAN no ba Organizasaun Mundiál Komérsiu (OMK).
“Ha’u hanoin katak dezafiu ne’ebé Timor-Leste hasoru nu’udár país joven ida, ema hothotu hatene. Ita iha frajilidade barak iha ámbitu institusionál, infraestrutura, rekursu humanu no mós asesu ba teknolojia”, Xanana hatete.
lidér karismátiku husu ba hothotu tanba futuru nasaun iha ema hotu nia liman, transforma futuru enerjétiku, inovativu no kooperativu.
“Labele haluha katak futuru iha ita hotu-hotu nia liman! Mai ita transforma futuro ne’e ho energia, inovasaun no Kooperasaun”, nia hakotu.
Iha fatin hanesan, Vise Primeiru-Ministru no Ministru Koordenadór Asuntu Ekónomiku no Ministru Turizmu Ambiente Francisco, Kalbuadi Lay, agradese ba emprezáriu hotu ne’ebé partisipa ona iha forúm internasionál ne’e.
“Ohin ita orgullu tebes iha forúm internasionál ida-ne’e, agradese ba emprezáriu hotu ne’ebé mai hosi nasaun sira hotu iha Ázia no seluk tan, ita-nia hasoru malu ida-ne’e sei hetan rezultadu di’ak ba ekonomia ita hotu nian”, Kalbuadi revela.
Emprejariu hosi nasaun 28 ne’e mak Austrália, Brazil, Kamboja, Xina, Hong Kong, Uniaun Europeia, India, Indonézia, Japaun, Korea Súl, Kwait, Laos, Malázia, Myanmar, Macau, Norway, Netherland, Portugal, Filipina, Qatar, Singapura, Taiwan, Thailandia,Inglaterra, Estadus Unidus Amerika (EUA) no Vietname.
Jornalista: Hortencio Sanchez
Editór : Zezito Silva
