DILI, 09 abríl 2024 (TATOLI)—Ekipa konjunta ne’ebé lidera husi Sekretaria Estadu Asuntu Toponímia Organizasaun Urbana (SEATOU) hakarak transforma sidade iha territóriu sai moos no organizadu liuhusi implementasaun orden ne’ebé estabelese ona.
Ekipa sira ne’ebé hamutuk ho SEATOU mak hanesan Jestaun Merkadu Dili, Ministériu Administrasaun Estatál (MAE), Ministériu Obra Públika (MOP), Ministéri Komérsiu no Indústria (MKI), Ministériu Turizmu no Ambiente (MTA), Ministériu Transporte no Komunikasaun (MTK), Polísia Nasionál Timor-Leste (PNTL), FALINTIL-Forsa Defeza Timor-Leste (F-FDTL), Terra no Propriedade, Reprezentante Prezidente Autoridade munisípiu Dili, Administradór postu iha munisípiu Dili no Xefe suku sira.
“Hakarak hato’o ba públiku, katak ekipa konjunta sei hahú serbisu iha terrenu hahú ohin ba oin, sei efikás liután ho objetivu prinsipál hodi forma ekipa konjunta ida-ne’e atu organiza sidade iha territóriu tomak, hodi transforma sai moos, organizadu, saudável no seguru. Moos ho nia sentidu organizadu, saudável no seguru. Moos katak ema hotu hakarak hela iha ambiente ne’ebé moos no laiha foer,” Sekretáriu Estadu Asuntu Toponímia Organizasaun Urbana, Germano Santa Brites Dias, hateten, liuhusi konferénsia imprensa, iha edifísiu MAE, Caicoli, kuarta ne’e.
Notísia relevante : SEATOU sobu barraka 92 okupa espasu públiku iha antigu merkadu Comoro
Ekipa konjunta sei halo serbisu maka’as hodi konkretiza objetivu ne’e, katak buat hotu tenke hatuur tuir ida-idak ninia fatin, liu-liu utilizasaun espasu públiku sira tenke tuir nia funsaun.
“Atu alkansa mehi ne’e mak ekipa konjuta sei halo serbisu hamutuk ho autoridade munisípiu sira hotu atu organiza vendedór sira ne’ebé fa’an sasán iha estrada ibun, muda bá merkadu hamutuk ho autoridade munisipál sira atu halo inspesaun iha terrenu hodi normaliza filafali trotoár sira ne’ebé ema sobu halo konstrusaun iha valeta leten nomós utiliza espasu públiku la tuir nia funsaun,” Sekretáriu Estadu akresenta.
Nune’e, ekipa sei halo fiskalizasaun no inspesaun iha terrenu tuir serbisu instituisaun idaidak ninian.
Atividade ne’e hala’o bazeia ba dekretu-lei númeru 3/2024 17 janeiru alterasaun dahuluk dekretu-lei númeru 33/2008 27 agostu, kona-ba ijiene no orden públiku.
Nune’e mós, iha dekretu-lei númeru 51/2016 28 dezembru kona-ba lisensiamentu mesajen publisitária, no dekretu-lei númeru 2/2017 22 marsu kona-ba sistema jestaun reziduu sólidu urbanu, inklui dekretu-lei númeru 3/2017 22 marsu kona-ba rejime zona estasionamentu durasaun limitada.
“Ho dekretu sira ne’ebé iha, país Timor-Leste koñesidu ho nia beleza natureza ne’ebé furak, riku ba biodiversidade mariña, maibé problema ne’ebé ita sempre hasoru iha terrenu maka lixu lekar iha fatin hotu-hotu, okupasaun ilegál ba espasu públiku, problema inundasaun, valeta ka esgotu nakonu ho rai no foer, estrada protokolu sira iha kapitál sai fali fatin hodi para karreta no motór privadu, merkadu nakfila ba hela fatin permanente, uma harii iha mota ninin no fó risku ba vida moris umanu nian,” nia tenik.
Governante ne’e dehan, Governu hakarak sidade organizadu no moos, tanba ne’e hakarak atu hadi’a ka re-organiza sidade hotu-hotu iha territóriu, atu garante implementasaun polítika toponímia, organizasaun urbana no ijiene orden públika iha munisípiu 13 no autoridade administrativu Ataúro.
Jornalista : Arminda Fonseca
Editora : Julia Chatarina
