SERVE,I.P Viqueque rekolla reseita rihun $5 iha trimestre dahuluk
VIQUEQUE, 09 abríl 2024 (TATOLI)- Servisu Rejistrasaun no Verifikasaun Emprezariál, Institutu Públiku (SERVE, I.P) sukursál munisípiu Viqueque, iha trimestrál dahuluk hahú hosi Janeiru to’o Marsu, konsege rekolla reseita $5.677 ba kofre Estadu.
Reseita totál $5.677 ne’e rekolla iha fulan-Janeiru $677, Fevereiru $2.891 no Marsu $2.109. Orsamentu referidu rekolla liuhosi rejistrasaun atividade komersiál ka négosiu sira ne’ebé hala’o iha munisípiu Viqueque no rejistu transporte públiku ne’ebé tula pasajeiru sira.
“Iha trimestrál dahuluk ne’e, ami konsege rejista transporte públiku hamutuk 20 ho gustu kada karreta ida rejistu ho selu $60. Maibé, kustu ida-ne’e ba rejistu empreza foun, fábrika batako, karpintária no restaurante ho kustu rejistu selu $60. Hanesan negósiu ki’ik hanesan kioske sira-ne’e ita-nia negosiante sira mai halo rejistu no la selu”, Koordenadora SERVE, I.P, munisípiu Viqueque, Cesaltina da Conceção Soares, informa ba Agência TATOLI,I.P, iha ninia kna’ar fatin, Beloi, ohin.
Menus rekursu umanu
Maske, SERVE,I.P iha biban atu rekolla reseita, maibé daudaun enfrenta hela problema menus rekursu umanu hodi fó atendimentu ba kliente sira-ne’ebé rejistu sira-nia atividade komérisu.
“Iha tinan kotuk, ami iha funsionáriu na’in-15 ne’e sufisente atu halo serbisu, maibé funsionáriu 12 mak kontratu hotu, nune’e hela funsionáriu ka pesoál tolu de’it mak daudaun ne’e fó atedimentu ba kliente sira,” nia afirma.
Daudaun, funsionáriu ne’ebé ativa no halo hela servisu iha SERVE,I.P munisípiu Viqueque na’in-tolu kompostu hosi Koordenadora, pesoál atendimentu públiku no arkivu mak na’in rua seluk.
Tuir dadus Servisu Rejistu no Verifikasaun Emprezariál, Institutu Públiku (SERVE,I.P), servisu hamutuk ho Autoridade Tributária no Autoridade Aduaneira (Alfándega) durante tinan 10 hahú 2013 to’o 2023 rekolla ona reseita hamutuk millaun $180 dollar amerikánu ba kofre Estadu.
Taxa referidu rekolla pursentu 20 hosi kompañia nasionál no internasionál hamutuk 46.000 maka durante ne’e selu impostu ba kofre Estadu.
Notísia relevante: 2024, SERVE,I.P halo rejistu movél ba uma ‘kost’ iha kapitál Dili
Jornalista : Vitorino Lopes da Costa
Editór : Florêncio Miranda Ximenes
