COVALIMA, 10 Abríl 2024 (TATOLI) –Iha trimestre dahuluk 2024, Komandu Polísia Nasionál Timor-Leste ( PNTL) Covalima rejista kazu hamutuk 33, informa Komandante PNTL Covalima, Superintendente Polísia Calisto Gonzaga.
Tipu kazu sira ne’e mak asalta malu iha 12, alfándega ualu, violénsia doméstika lima, asaltu seksuál rua, ameasa, burla, distúrbiu jerál, estraga propriedade, furtu no kazu rouba rejista ida-ida.
“Iha trimestre dahuluk ne’e ita rejistu kazu ladún barak, tanba tama iha tempu kuarezma, nune’e halo ema hotu kuidadu no halo peniténsia”, Superintendente Polísia Calisto Gonzaga dehan iha Santa Rosa.
PNTL Covalima presiza tau-atensaun ba problema joven sira hemu tua hodi halo barullu iha estrada públika, maibé atu garante seguransa la’ós PNTL mesak, tenke envolve sosiedade hodi kontribui ba seguransa. “Ho estístika kazu ne’ebé komandu rejista iha trimestre dahuluk sai sasukat ba PNTL atu garante nafatin segurasan ba komunidade”, dehan.
Redús kazu ne’e, tuir Calisto Gonzaga, uza estratejia filozofia komunitária ba prevensaun, liuhusi vijilánsia uma bá uma, halo advókasia no eskolta ba atividade misa nian, festa kazamentu nune’e la’o ho di’ak, pró-ativia ba situasaun ne’ebé hamosu instabilidade no buka líder komunitáriu, lia-na’in, veteranu no organizasaun atu buka solusaun ba problema no uza vizibilidade envolvimentu polisiál.
Tuir dadus estatístika 2023, PNTL Covalima rejista kazu 127 ho tipu sira mak hanesan asalta malu 53, violénsia doméstika 27, asaltu seksuál 13, estraga proprietária neen, alfándega 11, burla haat, furtu haat, ameasa tolu, tuda fatuk rua, omisídiu ida, imigrasaun ida, disputa rai ida no kazu arma branka ida. Prosesu hirak ne’e balun submete ona ba Ministériu Públiku, seluk iha ona Tribunál no balun aplika ona medida koasaun.
Prezidente Autoridade Munisípiu Covalima, Miguel Armada Cardoso, husu ba PNTL atu identifika no rejista fatin ne’ebé joven sira kria problema,, tanba kada semana nia mós halo reuniaun ho komandante munisípiu hodi haree kestaun kona-ba seguransa.
“Fatin ne’ebé identifikadu joven sira halo problema, bainhira númeru PNTL la to’o ha’u sei bolu Forsa Defeza Timor-Leste atu reforsa seguransa”, nia afirma.
Noísia relevante: PNTL Covalima orienta sidadaun suspende atividade jogu bola guling
Jornalista: Celestina Teles
Editora: Maria Auxiliadora
