DILI, 11 abríl 2024 (TATOLI)-–Autoridade Rejiaun Administrativa Espesiál Oé-Cusse (RAEOA) deside hapara movimentasaun aviaun ZEESM hodi submete ba prosesu investigasaun tanba identifika mosu irregularidade balun.
Prezidente Autoridade RAEOA, Rogério Tiago Lobato, akompaña husi Ministru Transporte no Komunikasaun, Miguel Marques Gonçalves Manetelu, Diretór Ezekutivu Aero Dili, Lourenço de Oliveira ho Autoridade Nasionál Administrasaun Aviasaun Timor-Leste (ANAATL), liuhusi konferénsia imprensa, informa katak atu solusiona konektividade aéreu nian durante aviaun ZEESM tama iha prosesu investigasaun, maka Aero Dili mak sei halo operasaun, ho rota Dili-Oé-cusse no Oé-cusse-Dili.
Maski nune’e, Aeroportu Rota do Sândalo daudaun ne’e presiza hetan sertifikasaun nune’e aviaun boot hanesan Aero Dili bele aterra iha ne’abá. Iha tempu hanesan mós, ekipa téknika husi Ministériu Transporte no Komunikasaun no Autoridade Aviasaun Sivíl halo hela serbisu no sei halo levantamentu iha aeroportu ne’e molok hetan sertifikasaun.
“Ami seidauk bele fó prazu ba sertifikasaun Aeroportu Rota do Sândalo, tanba ne’e sei liuhusi prosesu no prosedimentu ida, tenke kumpre buat sira ne’e hotu, no kuandu prontu ona mak ami marka ona loron hodi aviaun Aero Dili hahú semo bá Oé-Cusse,” Prezidente Autoridade hateten, iha Aeroportu Internasionál Prezidente Nicolau Lobato, Comoro, kinta ne’e.
Notísia relevante : Rogério Lobato preokupa despeza no reseita husi operasaun aviaun ZEESM
Nia dehan, prosesu ne’e sei lori tempu uitoan tanba sei halo uluk sertifikasaun ba Aeroportu Rota do Sândalo, maibé Autoridade garante katak konetividade aéreu ba Oé-cusse labele para.
Nune’e, ekipa téknika sei hamutuk ho ekipa Aero Dili hodi halo uluk levantamentu iha Aeroportu Rota do Sândalo hodi haree funsionamentu bombeiru, seguransa, no fasilidade balun ne’ebé presiza kompleta.
Semana ida halo operasaun dala-rua
Iha Biban hanesan, Diretór Ezekutivu Aero Dili, Lourenço de Oliveira, hateten, Aero Dili hanesan empreza komersiál, ne’ebé haree ba volume pasajeiru husi Oé-Cusse ne’e ki’ik atu aviaun ne’e bele halo operasaun, maibé maluk sira iha Oé-cusse presiza konetividade no presiza Governu nia ajuda.
“Ho tempu hanesan ne’e maka Aero Dili deside sei semo bá Oé-cusse dala-rua semana-ida, iha loron segunda dadeer no sesta lorokraik. Ida-ne’e bele fasilita mós investidór barak tama Oé-cusse. Ba Aero Dili sei la taka matan no sempre hatutan saida mak falta iha rai-laran, liu-liu iha transporte aéreu, dezde iha fasilidade infraestrutura hanesan iha Oé-cusse, ami sempre prontu atu fasilita Oé-cusse oan tomak ho transporte aéreu,” Lourenço de Oliveira tenik.
Diretór Ezekutivu empreza afirma, Aero Dili prontu nafatin serbí no fasilita transporte aéreu atu garante konetividade aéreu iha Timor-Leste.
Nune’e mós, Ministru Transporte no Komunikasaun, Miguel Marques Gonçalves Manetel, reforsa katak, daudaun ne’e sei hein sertifikasaun ba Aeroportu Rota do Sândalo hodi Aero Dili bele semo.
“Sesta agora Aero Dili seidauk semo tanba sei hein prosesu sertifikasaun ba aeroportu no ita-nia tékniku sira horisehik iha reuniaun no sei kontinua reuniaun tanba atu sertifika Aeroportu ida ho nível internasionál presiza fasilidade sira ne’ebé fó apoiu ne’e tenke di’ak. Horibainhira ami-nia vizita iha Oé-cusse haree katak presiza kompleta tan fasilidade balun no prontu ona Aero Dili bele semo ona,” Ministru Miguel Marques, infroma.
Governante ne’e salienta, Governu nafatin iha kompromisu atu serbisu hamutuk ho empreza aéreu ne’ebé halo operasaun iha Timor-Leste, liu-liu hanesan Aero Dili atubele garante no fasilita transporte aéreu no hafasil konetividade iha nível nasionál no internasionál.
Jornalista : Antónia Gusmão
Editora : Julia Chatarina
