COVALIMA, 11 Abríl 2024 (TATOLI) – Servisu Munisipál ba Administrasaun Rekursu Umanu (SMARU) fó sai rezultadu selesaun dokumentu ba vaga ba funsionáriu apoiu suku iha munisípiu Covalima no kandidatu hamutuk 230 mak liu ona iha prosesu ne’e.
Tuir dadus, ema hamutuk 330 mak aprezenta nia kandidatura, maibé 200-resin de’it mak liu, tanba la prienxe kritériu balun hanesan la asina kurríkulu vitae no rekerimentu atu dirije ne’e laloos.
“Ita taka sai ona rezultadu selesaun dokumetu ba funsionáriu apoiu suku iha kada postu administrativu sira, nune’e iha loron 17Abríl sira bele tuir ona entrevista”, Diretór SMARU, José Manuel Gonçalves, dehan, iha Sukaer-Laran, ohin.
Entrevista ne’e sei la’o durante semana-ida no depois fó sai rezultadu teste no ida ne’ebé liu sei asina kontratu iha 01 Maiu atu hala’o serbisu iha idaidak nia suku.
Vaga ne’ebé disponivel mak ba pozisaun ofisiál administrasaun, ofisiál finansa, sekretáriu administrasaun suku no ofisiál asuntu sosiál.
Administradór postu Tilomar, Venâncio Sarmento, konfirma katak nia simu ona rezultadu selesaun dokumentu ba prosesu rekrutamentu funsionáriu ba apoiu suku no daudaun ne’e fó sai ona iha kuadra avizu kada postu administrativu sira.
Bazeia ba Dekretu-Lei númeru 81/2023 kria servisu administrasaun-ida ba suku, hanesan servisu administrativu apoiu ba xefe suku, kompostu husi pozisaun hanesan sekretáriu administrasaun suku, ofisiál finansa suku, ofisiál administrasaun suku no ofisiál asuntu sosiál suku. Vaga ba funsionáriu apoiu suku ne’e kria ho dekretu-lei númeru 81/2023, 11 de Outubru.
Notísia relevante: SMARU simu ona lista kandidatu ne’ebé konkorre vaga ba pesoál apoiu suku
Jornalista: Celestina Teles
Editóra:Maria Auxiliadora
