COVALIMA, 04 Abríl 2024 (TATOLI) – Servisu Munisipál Administrasaun Rekursu Umanu (SMARU) simu ona dokumentu husi komisaun rekrutamentu ba kandidatu funsionáriu ne’ebé konkorre vaga ba pesoál apoiu suku iha Covalima.
Diretór SMARU, José Manuel Gonçalves, informa katak kandidatura ne’ebé konkorre vaga apoiu suku ba pozisaun ofisiál administrasaun, ofisiál finansa, sekretáriu administrasaun suku no ofisiál asuntu sosiál hamutuk 330, husi númeru ne’e kokorrente ba postu administrativu Suai hamutuk 71, Fatululik 19, Fatumea 27, Zumalai 100, Maucatar 36, Fohorem 34 no Tilomar 43.
Prosesu selesaun dokumentu halo husi komisaun rekrutamentu kada postu administrativu-sira ne’ebé hala’o iha loron 02 Abríl hafoin publika rezultadu selesaun dokumentu, bainhira lahetan protesta ruma husi konkorrente sira maka sei tama iha faze entrevista no bainhira pasa maka iha 01 Maiu bele asina ona kontratu.
Administradór Postu Fatumea, César Madeira, reforsa katak prosesu rekrutamentu husi postu entrega ona ba munisípiu, tanba molok halo rekrutamentu ne’e sira forma kedan ona komisaun.
“Iha Fatumea prezidente júri mak Sekretáriu Munisipál Planeamentu Investimentu no Dezenvolvimentu Integradu, Caetano Ribeiro,Vogál dahuluk mak Administradór postu Fatumea, Cesár Madeira, no daruak mak Diretora Servisu Munisipál Apoiu Organizasaun Naun-Governamentál no Organizasaun Komunitária, Maria de Jesus Perreira”, nia dehan.
Rekorde katak, iha 18 Marsu, Ministériu Administrasaun Estatál (MAE) halo ona lasamentu ofisiál ba rekrutamentu funsionáriu apoiu suku 452 iha Timor-Leste.
Bazeia ba Dekretu-Lei númeru 81/2023 kria serbisu administrasaun-ida ba suku hanesan serbisu administrativu apoiu ba xefe suku, kompostu husi pozisaun hanesan Sekretáriu Administrasaun Suku, Ofisiál Finansa Suku, Ofisiál Administrasaun Suku, no ofisiál asuntu sosiál suku.
Prosesu rekrutamentu durante loron 10 ne’ebé halo selesaun sei hahú husi loron 19 fulan-Marsu to’o 01 fulan- Abril no kandidatu ne’ebé hetan aprovasaun ikus sei dezempeña knaar importante iha ezekusaun, administrasaun ho monitorizasaun ba inisiativa-sira ne’ebé hakarak avansa progresu sosiál no ekonómiku iha komunidade sira-nia leet.
Notísia relevante: MAE loke prosesu rekrutamentu pesoál servisu administrativu apoia suku
Jornalista: Celestina Teles
Editora: Maria Auxiliadora
