DILI, 11 abríl 2024 (TATOLI)–Membru Konsellu Jerál Administrasaun Fundu Espesiál Dezenvolvimentu Atáuro (FEDA), kinta ne’e, realiza reuniaun dahuluk hodi halo apresiasaun ba programa infraestrutura, maibé la aprova tanba programa ne’ebé aprezenta iha duplikasaun ho programa Governu nian.
“Ami Konsellu Jerál Administrasaun ohin atu halo aprovasaun ba Orsamentu Jeral Estadu 2024 ba infraestrutura bázika, maibé hafoin ita halo diskusaun ba aprezentasaun husi FEDA, haree katak projetu sira balun finansia ona husi Governu Sentrál, entaun ita ohin deside ekipa hadi’a filafali ba projetu ne’ebé Governu Sentrál finansia ona no muda fali ba projetu sira ne’ebé komunidade iha área rurál sira presiza, liu-liu kona-ba saúde, edukasaun bee-moos no seluk tan,” Prezidente Konsellu Jerál FEDA, Tomás do Rosário Cabral, hateten, iha salaun Exclesior Resort, iha Praia dos Coqueiros.
Programa infraestrutura ne’ebé FEDA ohin aprezenta maibé la konsege hetan aprovasaun no presiza hadi’a fali mak hanesan konstrusaun estrada foun husi aldeia Bite bá aldeia Berau suku Macadade nian, ho orsamentu $650.000, konstrusaun estrada foun husi aldeia Arlo bá aldeia Adara suku Beloi nian ho orsamentu $300.000, konstrusaun estrada foun husi aldeia Adara ba aldeia Macer suku Beloi nian ho orsamentu $449.999, halo estudu viabilidade ba portu multifunsaun iha Ataúro ho nia orsamentu $131.232, no ikus halo instalasaun ba enerjia renovável hamutuk $157.768.
“Ita husu orsamentu ne’ebé Governu Sentrál finansia tiha ona ba projetu sira hanesan estrada parte Ministériu Obra Públika nian la’o, enerjia renovável tinan ne’e sei lansa, portu Ministériu Transporte no Telekomunikasaun (MTK) mós daudaun halo hela estudu viabilidade ba portu sira, entaun orsamentu ida-ne’e nian ita husu FEDA muda fali ba projetu ne’ebé komunidade presiza liu ezemplu edukasaun, saúde no seluk tan,” nia akresenta.
Notísia relevante : PN aprova FEDA millaun $13 garente povu Ataúro nia moris di’ak
Governu aloka orsamentu ba FEDA ho montante millaun$2-resin, iha tinan ne’e, hodi fó apoiu ba servisu administrasaun Atáuro nian, liu-liu ba projetu sira ne’ebé fó benefísiu ki’ik.
“Ohin ita haruka sira filafali ba koordena ho Autoridade Ataúro, hili fali projetu sira seluk konsellu aprova atu hahú implementa ona,” nia tenik.
Iha fatin hanesan, Diretór Ezekutivu FEDA, Hermes Barros, hateten, parte FEDA sei koordena fali ho Autoridade Ataúro mak foin deside.
“Ami sei koordena ho Autoridade Ataúro mak foin ita deside fali projetu saida mak bele troka fali ba projetu sira ohin hasai ne’e,” nia dehan.
Reuniaun dahuluk Konsellu Jerál FEDA ne’ebé ohin realiza ne’e bazeia ba dekretu-lei númeru 83/2023 23 novembru.
Membru Konsellu Jerál FEDA ne’ebé ohin marka prezensa iha reuniaun mak hanesan Ministériu Administrasaun Estatál, Ministériu Obra Públika, Ministériu Transporte Telekomunikasaun, Ministériu Planeamentu Investimentu no Estratéjiku no reprezentante Ministériu Finansa.
Jornalista : Arminda Fonseca
Editora : Julia Chatarina
