DILI, 11 abríl 2024 (TATOLI)-Enkarregadu Negósiu Estranjeiru, Embaixada Vatikanu iha Timor-Leste, Monseñor Marco Sprizzi, louva Estadu Timor-Leste liuliu Governu ne’ebé halo preparasaun exelente tebes hodi simu vizita Papa Francisco.
“Ha’u nia observasaun Governu halo preparasaun exelente tebes, horiseik ha’u hasoru ho Primeiru Ministru, ohin ho fali Prezidente Repúblika no kada loron ha’u rasik kontaktu ho Ministru Administrasaun Estatál,Tomas Cabrál no Ministériu relevante sira hotu katak preparasaun la’o másimu tebes,” Monseñor Marco hatete ba jornalista sira iha Palásiu Prezidensiál Dili, kinta ne’e.
Tuir nia, preparasaun ne’ebé Governu halo extraordunáriu tebes iha kondisaun hotu, atu nune’e Amu Papa bele mai vizita povu Timor-Leste.
“Preparasaun ida ne’ebé, ami haree extraordináriu tebes, Timor-Leste iha seriedade duni hakarak Papa atu mai vizita, Papa mai atu hakbesik aan liubá povu sira, preparasaun hotu ne’e atu povu sira iha área rurál, iha Munisípiu, Aldeia, Suku tenke mai hotu atu hakbesik sira nia aan ba Amu Papa,” afirma Monseñor ne’e
Nia dehan, mehi Papa nian hakarak besik ba povu Timor-Leste no povu Timor-Leste nia mehi hakarak besik ba Amu Papa.
“Papa mai iha ne’e la’os de’it Dili, la’os de’it mai hasoru autoridade sira, maibé mai atu hasoru malu ho povu sira. Entaun servisu hotu ne’ebé Governu halo, gastu ne’ebé Governu halo atu kria kondisaun adekuadu ba povu sira hodi besik ba Amu Papa,” katak.
Aban, Igreja anúnsia data fiksu vizita Amu Papa
Durante enkontru ho Prezidente Repúblika reprezentante Vatikanu iha Timor-Leste ne’e informa kona-ba, sesta feira (12/04), tuku 19:00, kalan, iha kámara Eklesiástika Lecidere, sei fó sai kona-ba data fiksu ne’ebé Papa vizita Timor-Leste.
Aleinde ne’e, sei fó sai mós kona-ba preparasaun hotu ne’ebé Igreja ho Governu halo ona hodi hein vizita Amu Papa Francisco.
Rekorda fali katak, vizita Sua Santidade Papa Fransisco mai Timor-leste, Governu liuhusi reuniaun estraordinariu konsellu Ministru delibera ona atu autoriza despeza to’o montante millaun $12 husi fundu kontijensia ba Komisaun altu nível institusionál, hodi organiza atividade Preparasaun ba vizita Papa Francisco nian.
Durante vizita, eventu lubuk ne’ebé sei akontese no antes ne’e Reprejentante Santasé husi Roma halo ona reuniaun barak ho ekipa Governu nian, ho Ministériu oin-oin ne’ebé lideradu husi Primeiru Ministru.
Notísia relevante:PM Xanana garante seguransa ba vizita Amu Papa Francisco mai Timor-Leste
Jornalista: Hortencio Sanchez
Editór : Florencio Miranda Ximenes
