DILI, 11 abríl 2024 (TATOLI)–Sekretaria Estadu Kooperativa (SEKoop) realiza enkontru ho parseiru dezenvolvimentu sira kona-ba armonizasaun kooperasaun hodi apoia grupu kooperativa sira.
Parseiru dezenvolvimentu sira ne’ebé partisipa mai husi World Food Programme (WFP), Mary Mackillop, Care internasionál, Ajénsia Kooperasaun Internasionál Koreia (KOICA), no Japan International Cooperation Agency (JICA).
Sekretáriu Estadu Kooperativa, Arsénio Perreira da Silva, hateten, objetivu husi armonizasaun interrese ba iha programa SEKoop nian tanba kooperativa hanesan setór ne’ebé importante ba kresimentu ekonomia rai-laran, liu-liu populasaun iha área rurál sira ne’ebé hala’o atividade ekonómiku liuhusi kooperativa.
“Ita hotu hatene katak maioria populasaun Timor-Leste hela iha área rurál no sira-nia dependénsia ba iha produsaun hanesan produtu agríkola. Kooperativa ninia ramu hamutuk 216 inklui kooperativa agrikultura, peska, pekuária,” Sekretáriu Estadu relata bainhira halo abertura ba enkontru, iha Timor Plaza, kinta ne’e.
Notísia relevante : SEKoop prioriza programa kooperativa agríkola
Governate ne’e hatutan, razaun organiza enkontru ho parseiru dezenvolvimentu sira hodi akumula hanoin husi parseiru sira hodi kontribui ba implementasaun programa iha mandatu IX Governu tanba liuhusi programa sira-ne’e maka bele hasa’e ekonomia uma-kain.
“Planu Estratéjiku SEKoop nian iha ona, ne’ebé liuhusi enkontru armonizasaun ne’e bele reafirma liután hamutuk ho parseiru sira hodi lori susesu ba planu estratéjiku Governu nian. Tanba parseiru dezenvolvimentu sira ne’e mak durante serbisu direta ho populasaun iha área rurál ka grupu produtór-sira,” Arsénio akresenta.
Iha reuniaun ne’e, parseiru sira halo aprezentasaun ba sira-nia programa ne’ebé durante sira halo no kontinua ba oin, depois armoniza ho programa Governu nian, nune’e evita programa dubru.
Governante ne’e rekoñese katak durante ne’e grupu kooperativa sira hasoru dezafiu, tanba ne’e maka prezensa Governu liuhusi Sekretaria Estadu Kooperativa mak fasilita sira hodi mellora iha jestaun nian.
Iha biban hanesan, Ofisiál Lojístika WFP, Joni Bareto, konsidera enkontru ne’e di’ak tebes no nu’udar pasu ida importante tebes ba futuru kooperasaun ho SEKoop.
“Molok ne’e ami halo ona enkontru ho SEKoop hodi ko’alia mós kona-ba kooperasaun ne’ebé sei hala’o iha área agrikultura nian, liu-liu ba sorgum, ne’e duni ami sei serbisu hamutuk oinsá mak hakbesik ba agrikultór hodi haree sira-nia produsaun ba sorgum rasik. Maibé sei estabelese akordu kooperasaun ida entre SEKoop no WFP,” Ofisiál Lojístika ne’e haktuir.
WFP louva inisiativa SEKoop nian tanba liuhusi enkontru armonizasaun ne’e ho partisipasaun parseiru sira nian bele tau hanoin hamutuk hodi apoia povu agrikultór sira liuhusi grupu kooperativa sira.
“Fiar katak ho enkontru ida ne’e lori ami hotu bele iha koñesementu ne’ebé kle’an liu kona-ba saida mak SEKoop sei halo iha futuru. Ha’u espera katak liuhusi SEKoop ita bele halo moris filafali ita-nia agrikultór sira, liu-liu rai ne’ebé sei mamuk hela bele utiliza hodi prodús buat ruma ba ekonomia família no ekonomia nasaun,” nia tenik.
Jornalista : Antónia Gusmão
Editora : Julia Chatarina
