iklan

POLÍTIKA

Semana oin, Komisaun B halo audiénsia públika ba projetu-lei Protokolu Estadu

Semana oin, Komisaun B halo audiénsia públika ba projetu-lei Protokolu Estadu

Deputadu Bankada Coselho Nacional Reconstrução Timor-Leste (CNRT), Natalino dos Santos.

DILI, 11 abríl 2024 (TATOLI)—Komisaun B trata asuntu Negósiu Estranjeiru no Defeza ho Seguransa iha Parlamentu Nasionál (PN), tau ona ajenda iha semana oin hahú halo audiénsia públika ba projetu-lei númeru 7/VI (1a)-Prosedénsia no Protokolu Estadu.

Notísia Relevante: Meza PN baixa projetu-lei Protokolu Estadu ba komisaun B

“Ami deside ona kalendáriu, semana oin iha ajenda atu halo audiénsia públika ba projetu-lei Protokolu Estadu. Ne’ebé sei konvida parte Ministériu Negósiu Estranjeiru no Kooperasaun (MNEK) inklui entidade relevante sira seluk hodi bele rona mós sira-nia hanoin ba projetu-lei ne’e,” Deputadu membru komisaun B iha PN, Natalino dos Santos, hateten ba Agência Tatoli iha uma fukun PN, kinta ne’e.

Audiénsia públika ne’e bele aumenta Deputadu sira-nia referénsia hodi halo diskusaun ba projetu-lei ne’e iha faze diskusaun ba jeneralidade no espesialidade.

Tanba ne’e, nia dehan, agora parte legál komisaun nian haree hela hodi halo nota tékniku ba projetu-lei ne’e no ninia  konteúdu hosi projetu-lei ne’e mak bele define ona protokolu Estadu, tanba tinan 20-resin ona Timor-Leste seidauk iha lei ba ida-ne’e.

Nune’e, tuir nia, konfuzaun barak tanba haree ierárkia órgaun soberania haat ne’e, entaun TL tau ona regra protokolu rigirozu hodi ema bele hatene iha eskalaun Governu, Prezidénsiál, PN ninian iha ne’ebé no iha instituisaun Estadu sira seluk tuir ierárkia ne’ebé iha.

Membru órgaun lejislativu ne’e seidauk fó sai projetu-lei ne’e iha artigu hamutuk hira, tanba komisaun sei fó apresiasaun inisiál uluk.

Antes ne’e. iha 26 Marsu 2024, meza PN liuhusi reuniaun plenária anúnsiu no baixa projetu-lei númeru 7/VI (1a)-Prosedénsia no Protokolu Estadu ba komisaun B trata asuntu Negósiu Estranjeiru, Defeza no Seguransa hodi fó apresiasaun inisiál.

“Nune’e konvida Prezidente komisaun B hodi simu projetu-lei,” Prezidente Interina no atuál Primeira Vise Prezidente PN, Maria Teresinha Viegas, fó sai iha sala plenária PN.

Primeira Vise Prezidente ne’e, seidauk esplika detallu konteúdu projetu-lei ne’e tanba komisaun sei fó uluk apresiasaun inisiál.

Antes ne’e, liuhusi reuniaun plenária, Deputada CNRT, Maria Gorumali Barreto, husu Governu atu koordena ho órgaun lejislativu hodi bele kria Lei Protokulu Estadu, tanba Timor-Leste restaura ona nia indepedénsia tinan 20-resin laiha lei Protokolu Estadu, nune’e TL falla iha protokolu Estadu bainhira realiza eventu importante sira husi instituisaun Estadu.

Ne’ebé, nia dehan, presiza halo kapasitasaun ba protokulu iha ministériu sira hotu no kria Lei Protokolu Estadu.

Deputada CNRT, Angela Maria Corvelo de Andrade Sarmento, hateten protokulu Estadu ne’e preokupasaun ida katak TL tenke iha duni lei protokolu Estadu, tanba dalabarak TL nia entidade boot sira ladún tuir regra protokolu.

“Protolu ne’e regra ida, ita bele dehan ne’e mai husi ita-nia beiala sira no iha uma lulik sira mós iha protokolu, tanba ne’e mak Estadu presiza iha duni lei ida protokolu Estadu hodi regula ema hotu tuir,” nia hateten.

Jornalista : Nelson de Sousa

Editór        : Cancio Ximenes

iklan
iklan

Leave a Reply

iklan
error: Content is protected !!