PORT MORESBY, 10 abríl 2024 (TATOLI)- Sekretáriu organizasaun g7+, Helder da Costa, hasoru malu ho autoridade másima Komisaun Nasionál Papua Nova Guiné (PNG) hodi troka impresaun no hanoin ba malu kona-ba sistema organiza eleisaun tuir dalan demokrasia nian.
Sekretáriu jerál g7+, Helder da Costa, aprezenta mós susesu sira ne’ebé organizasaun g7+ halo ona, liuliu halo observasaun ba eleisaun ba país membru sira.
Enkontru ne’e mós tuir, sekretáriu jerál, hanesan enkontru bilaterál ida hodi husu mós prezidente Komisaun Nasionál Eleisaun PNG hodi lidera organizasaun g7+ halo observasaun ba Eleisaun Parlamentar iha illa Salomon iha loron 17 abríl 2024 mai.
“Ohin ami foin halo enkontru bilaterál ida ho Chief electoral commission ka prezidente komisaun eleisaun PNG nian señor Simon Sinai; ema Papua Nova Guiné ida-ne’ebé agora sei lidera delegasaun g7+ atu ba halo observasaun ka sai observadór ba Eleisaun Parlamentár ne’ebé sei hala’o iha Illa Salomon (Solomon Island) semana oin, loron 17 abril 2024,” sekretáriu jerál g7+ relata, iha salaun enkontru CNE, iha kapitál Port Moresby, Papua Nova Guine, kuarta ne’e.
Sekretáriu jerál g7+ afirma tan katak iha sorumutu ne’e partilla mós esperiénsia kona-ba misaun observadór g7+ nian iha nasaun membru sira oinsá fó susesu ba eleisaun iha nasaun membru.
Iha biban ne’e, Prezidente CNE, Papua Nova Guiné, Simon Sinai sente onradu tanba bele hetan fiar husi sekretaridu g7+ hodi lidera delegasaun hala’o observasaun ba Eleisaun parlamentar iha illa Salomon.
“Ha’u sente onradu ba responsabilidade ida-ne’e iha illa pasífiku nian, no prontu la’o hamutuk ho ekipa g7+, hodi partisipa no observa eleisaun iha nasaun membru nian liu-liu iha illa salomon,” Simon hateten.
Nia akresenta, liuhusi observasaun ida-ne’e oinsá bele hatene di’ak liután sistema organiza eleisaun iha sistema demokrátiku nia laran no dezafiu saida mak enfrenta no oinsá fó solusaun.
Entertantu, antes ne’e, organizasaun g7+ hala’o ona observasaun ba eleisaun ba nasaun membru sira mak hanesan eleisaun iha Siera Leone ne’ebé realiza, iha loron 24 juñu 2023, eleisaun iha nasaun Liberian iha loron-10 outubru 2023, eleisaun iha Guiné-Bissau iha loron-4 juñu 2023 no mós Eleisaun Parlamentar ne’ebé realiza iha 19 maiu 2023 iha Timor-Leste, no iha loron-17 abríl 2024 sei hala’o mós observasaun ba Eleisaun Parlamentar iha Illa Salomon.
Jornalista : Anito Soares
Editór : Rafael Ximenes de A. Belo
