iklan

DEFEZA, HEADLINE

Ró JS MURASAME vizita TL hodi hametin kooperasaun iha área defeza

Ró JS MURASAME vizita TL hodi hametin kooperasaun iha área defeza

Embaxador jepaun iha Timor leste ho kapitaun Marina Kawano Kunihiko ho nia ekipa neebe mai ho Ro JS MURASAME semu ho dansa tradisional husi joventudi sira, iha fonte kais dili, 12 abril 2024. Foto Tatoli/Antonio Daciparu

DILI, 12 abríl 2024 (TATOLI) –Ministru Defeza Kontra Almirante Donanciano Costa Gomes Pedro Klamar Fuik, hateten, vizita ró funu JS MURASAME nia-vizita atu intensifika kooperasaun entre Timor-Leste no Japaun iha área defeza nian.

“Ró ne’e vizita ba dala tolu ona, primeiru iha 2016, segundu 2020 no tinan ne’e nia mai tan, ida ne’e atu intensifika ita nia kooperasaun iha ámbitu defeza liuliu kestaun seguransa máritima ne’ebé importante tebes ba ita ho Japaun,” Ministru Klamar Fuik, hateten ba jornalista sira iha Kuartél Jerál FALINTIL-Forsa Defeza Timor-Leste (F-FDTL) Fatuhada Dili hafoin simu vizita hosi kapitaun ró JS MURASAME, sesta ne’e.

Vizita ró  referidu atu hatutan pás ne’ebé Japaun iha mai to’o Timor-Leste no prosperidade ne’ebé povu Japaun iha bele estende to’o Timor-Leste.

Governante ne’e relemba, durante Timor-Leste hetan independénsia to’o ohin loron Japaun hanesan nasaun ne’ebé apoia barak Timor-Leste nia dezenvolvimentu iha área oioin.

“Iha área militár nian, bainhira ita hetan independénsia Japaun apoia hodi fó formasaun ba ita nia militár sira iha akadémia militár Japaun. Agora sira mós hakarak atu apoiu ita nia komponente navál atu bele proteje ita nia tasi,” nia dehan.

Iha fatin hanesan, Embaixadór Japaun iha Timor-Leste, Tetsuya Kimura, agradese ba Governu Timor-Leste ne’ebé simu ona ró MURASAME no vizita ne’e bele hametin liutan relasaun entre nasaun rua.

Embaixador Japaun iha Timor-Leste ho kapitaun Marina Kawano Kunihiko ho nia ekipa ne’ebe mai ho ro JS MURASAME hafoin hala’o enkontru kortezial ho Ministru Defeza, Pedro Klamar Fuik, iha Fatuhada dili, 12 abril 2024.Foto Tatoli/Antonio Daciparu

“Ami agradese ba Governu Timor-Leste ne’ebé mak simu ró ne’e ho di’ak tebes, fiar katak vizita ne’e hanesan parte ida hametin liutan Timor-Leste ho Japaun nia relasaun. Vizita ne’e hanesan mós vizita amizade hosi Ministeriu Defeza Japaun ho Ministeriu Defeza Timor-Leste hodi troka esperiensia ba malu,” Embaxadór Kimura tenik.

Ró JS MURASAME hosi Japaun Vizita Timor-Leste durante loron tolu hahú 12-14 abríl. Ró ne’e akompaña direta hosi Komandante Divizaun eskoltu ida, Forsa Marítima Defesa hosi Japaun, Kapitaun Kawano Kohiniko kompostu ho militár japonés hamutuk ema 241.

Vizita ida ne’e nia objetivu prinsipál mak atu hametin relasaun diplomátika no kooperasaun bilaterál entre país rua.

Iha ámbitu vizita nian sei iha mós vizita hosi militár Japonés sira ba Museu Rezisténsia no sei iha mós jogu amigavél futeból ne’ebé ekipa militár hosi Japaun sei hasoru ekipa adversáriu hosi Instituisaun F-FDTL.

Japaun ho Timor-Leste iha relasaun diplomátika liu tinan 20-resin durante restaurasaun independénsia, iha loron 20 fulan Maiu 2002.

Komadante Naval Higinio Neves,bainhira simu kapitaun Marina Kawano Kunihiko ne’ebe mai ho ro JS MURASAME iha ponte kais Dili, 12 abril 2024.Foto Tatoli/Antonio Daciparu

Iha tinan 1999 estabelese TFET(Trust Fund for East Timor) liuhosi Konferénsia Internasional Doador nian ne’ebé hala’o iha Tókio (Japaun) iha 17 dezembru 1999, superviziona hosi Banku Mundial no Banku Dezenvolvimentu Aziátiku hodi harí hikas infrastrutura iha setór sira ne’ebé importante hanesan saúde, edukasaun, no agrikultura.

Iha loron 14 to’o 19 fulan-dezembru tinan 2023 Primeiru Ministru, Kay Rala Xanana Gusmão partisipa iha Simeira Japaun hodi selebra relasaun entre Japaun no ASEAN ne’ebé kompleta ona tinan 50 iha 2023.

No iha parte seluk, Xefe Governu Timor-Leste mós hala’o enkontru bilaterál ho Primeiru Ministru Japaun hodi fortalese relasaun no kooperasaun bilaterál entre nasaun rua.

Iha okaziaun ne’e, Primeiru Ministru Timor-Leste hato’o ninia apresiasaun ba kontribuisaun hosi Forsa de Autodefesa Japão (JSDF) ba asisténsia umanitária no apoiu ba vítima sira ne’ebé afeta hosi dezastre natural sira.

Notísia relevante: Aban, ró auto-defeza Japaun MURASAME” mai Timor-Leste

Jornalista: Hortencio Sanchez

Editór      : Florencio Miranda Ximenes

iklan
iklan

Leave a Reply

iklan
error: Content is protected !!