SEDL husu empreza aselera konstrusaun rezidénsia PAM Viqueque  

VIQUEQUE,12 abríl  2024 (TATOLI)- Sekretáriu Estadu Dezenvolvimentu Lokál (SEDL), Mateus dos Santos Tallo, husu empreza responsavél aselera servisu konstrusaun fíziku hanesan rezidésia, jardín no moru ba Prezidente Autoridade Munisípiu Viqueque.

Daudaun progresu konstrusaun atinje ona 50%.

“Projetu ida-ne’e tinan kotuk 2023 nian ne’ebé ha’u husu empreza tenke aselera prosesu kontrusaun. Karik iha  serbisu sira-ne’ebé seidauk hotu  foku atu nune’e bele finaliza obra.  Tanba polítika kria Programa Dezenvolvimentu Integradu Munisipál ida-ne’e atu hakbiit setór privadu liuliu  empreza lokál sira iha munisípiu”, hateten, Mateus dos Santos Tallo, hafoin ramata halo monitorizasaun projetu reabilitasaun rezidénsia PAM, iha suku Caraubalo, kinta (11/04).

Governante ne’e enkoraja traballadór sira  hosi  empreza Peacefull UNIP, Lda atu nafatin esforsu hodi finaliza obra tuir kalendáriu no husu labele abandona servisu.

Tuir relatóriu PDIM munisípiu Viqueque ba tinan 2023 hamutuk haat maka hanesan armazén rai ai-moruk atinje 100%, edifísiu Ensinu Báziku Filiál (EBF) Cailaquebabu lokaliza postu Lacluta atinje 100%, konstrusaun edifísiu administrasaun postu Ossu no morru haleu atinje 33.0%, inklui rezidénsia PAM no morru atinje 50%.

Garante finaliza obra ho kualidade

Entretantu, Jestór Empreza Peaceful UNIP, Lda, Pascoal Vital, informa, progresu konstrusaun atinje ona 50% tanba uma taka ona no taka ona plafon no sei falta jardín maka sei prosesu no sei kria mós kampu futsál iha rezidénsia laran.

“Ami-nia servisu kle’ur tanba rezidénsia ne’e uma antiga nune’e ami tenke halo mudansa ba item balun,  Tan ne’e mak servisu la’o tarde. Maibé, ami sei esforsu hodi aselera servisu ne’ebé Governu fó fiar ba ami no ami garante nia kualidade,” Pascoal subliña

Iha fatin hanesan, Prezidente Autoridade Munisípiu Viqueque, Francisco Cruz Simões Gonzaga Soares, rekoñese servisu empreza Paeceful ne’ebé ho traballadór barak no servisu lalais nune’e nian sei estende kontratu atu empreza bele finaliza servisu.

“Ha’u haree empreza ida-ne’e servisu lalais. Ha’u mós hakarak empreza nafatin aselera sira-nia responsavél ida-ne’e”. nia haktuir.

Enkuntu, konstrusaun rezidénsia ho morru protesaun ne’e hahú servisu iha loron  loron 7 Jullu tinan 2023 ho totál osan hamutuk $470.225,91 no ho totál traballadór totál hamutuk na’in-38.

Notísia relevante: Tempu besik, Empreza finaliza konstrusaun postu saúde Builale no Uaimori

Jornalista : Vitorino Lopes da Costa

Editór      : Florencio Miranda Ximenes