Tempu besik, Empreza finaliza konstrusaun postu saúde Builale no Uaimori
VIQUEQUE, 02 fevereiru 2023 (TATOLI)— Diretór Serbisu Saúde Munisípiu Viqeuque, Pedro da Silva Freitas, informa tempu besik empreza Borala, Lda, finaliza ona konstrusaun postu saúde suku Builale, postu Ossu no postu saúde Uaimori, postu Viqueque-vila, munisípiu Viqueque.
“Progresu konstrusaun ba postu saúde rua ne’ebé lokaliza iha suku Uaimori no Builale nian ne’e kompañia responsavél sei finaliza iha tempu besik tanba progresu konstrusaun fíziku atinije ona 99%. Bainhira kompañia finaliza no entrega ba ami hodi halo inagurasaun postu saúde rua atu utuliza ba atendimentu komunidade”, hateten Pedro da Silva Freitas, ba Agência TATOLI, iha ninia kna’ar fatin, Beobe, kinta ne’e.
Hafoin inaugura, Diretór ne’e afirma sei koloka pesoál saúde ba postu saúde rua hodi fó atendimentu ba pasiénste sira iha suku rua refere.
Fundu ba konstrusaun ne’e hosi Orsamentu Jerál Estadu (OJE) 2021 ho montante $327.232,66, ne’ebé konstrui hosi empreza Borala, Lda, hahú iha loron 25 fevereiru 2022. Enkuantu konstrusaun ba infraestrutura husi komunidade Japaun ho kustu projetu $90.000, hahú konstrusaun 31 maiu 2022.
Tuir dadus populasaun husi Suku Builale, (sensus uma-kain tinan 2015) hamutuk 1.137 no suku Builale iha aldeia lima kompostu husi Bete Cai Ana, Cai Leti Ana, Cai Tara Hu, Heni Uta no Liaro.
Nune’e, Suku Uaimori ho totál populasaun 1.142 hosi totál uma-kain 242 (sensu pupulasaun tinan 2015). Suku Uaimori iha aldeia neen, kompostu husi Lulei, Me-Uai, Uaibubo, Uatulesu, Uma-Bo O no Uma-Liurai.
Notísia relevante:Konstrusaun fiziku postu saude Uaimori atinje 75
Jornalista: Vitorino Lopes da Costa
Editór : Florencio Miranda Ximenes
