COVALIMA, 12 Abríl 2024 (TATOLI) – Sentru Solidariedade Sosiál no Inkluzaun (SSI) iha Covalima halo ona akompañamentu besik ba kazu violénsia ho tipu oioin hamutuk 12.
Kazu sira ne’e mak violénsia doméstika iha lima, abuzu seksuál ba menór rua, insestu rua, atu seksuál ba labarik ida, kazu abandona rua, ne’ebé nia prosesu to’o ona iha Ministériu Públiku (MP).
Diretór SSI, Agapito Assis, hateten sentru serbisu hamutuk ho rede referál sira hodi halo asaun prevensaun, liuhusi sensibilizasaun informasaun sobre asuntu no papél rede referál sira iha suku oinsá bele halo atendimentu ba vítima sira.
“Ami halo akompaña kazu violénsia bazeia ba jéneru, halo protesaun ba labarik, ema ho difisénsia no seluk tan tanba ita servisu hamutuk ho rede referál sira hodi halo atendimentu di’ak ba feton maluk difisiénsia no labarik sira atu labele hetan diskriminasaun no violasaun”, Agapito Assis dehan iha Santa Rosa, ohin.
Iha sorin seluk, Xefe Investigasaun Polísia Nasionál Timor-Leste iha Unidade Ema ho Vulneravel (PNTL-VPU) Covalima, Primeira-Sarjentu Amélia de Jesus Amaral informa katak, entre Janeiru no Marsu, VPU mós rejista kazu hamutuk 11 ho tipu violénsia bazeia ba jéneru lima, abuzu seksuál rua, insestu rua , atu seksuál ida no violasaun seksuál ida.
Husi númeru kazu ne’e 10 nia prosesu iha Ministériu Públiku no ba kazu abuzu seksuál no atu seksuál kumpre ona pena iha prizaun Suai no ida mak seidauk lori bá prokuradór tanba sei halo identifikasaun.
“PNTL-VPU hasoru difikuldade iha falta rekursu tanba bainhira ha’u sai bá fatin seluk, entaun lahalo atendimentu ba kazu violénsia doméstika, abuzu seksuál no dalaruma kolega balun halo investigasaun, maibé ladún kle’an”, nia realsa.
Notísia relevante: PNTL Covalima rejista kazu 33 iha Janeiru-Marsu
Jornalista: Celestina Teles
Editóra: Maria Auxiliadora
