DILI, 12 abríl 2024 (TATOLI)-Prezidente Repúblika, José Ramos Horta, husu ba líder nasionál no polítiku hotu iha Timor-Leste fó liman ba malu hodi simu vizita Sua Santidade Papa Francisco ne’ebé konfirmadu ona sei vizita nasaun ne’e iha 09 to’o 11 setembru tinan ne’e.
“Estadu ho Igreja servisu maka’as ona hodi simu Amu Papa. Nune’e husu líder nasionál no polítiku inklui sidadaun hotu ho relijiaun katólika no relijiaun sira seluk fó liman ba malu, kolabora servisu hamutuk atu simu ita nia líder boot,” PR Horta hatete bainhira hala’o vizita ba ró funu JS MURASAME iha tasi klaran Dili, sesta kalan.
Nia dehan, fó liman ba malu atu konsagra Timor-Leste nia pozisaun hodi sai nu’udar nasaun fraternidade iha mundu.
“Ita sei kria kondisaun ne’ebé bele atu ita nia povu sente hodi hakbesik ba Sua Santidade, nune’e Sua Santidade mós bele sente nia mehi sai realidade vizita povu Timor-Leste,” katak.
Tanba Xefe Estadu dehan vizita Papa nian ne’e timoroan hotu hein kle’ur tebes ona ho orasaun no fiar metin, iha tinan ida ne’e sai duni realidade.
Ho nune’e ema númeru ida iha Timor-Leste ne’e husu ba sidadaun hotu atu nafatin halo orasaun hodi hein vizita Papa nian bele la’o ho susesu.
Tuir rute ne’ebé iha Papa hala’o nia vizita uluk mai Indonézia liubá Papua Nova Guine, liumai Timor-Leste loron tolu hafoin liu fali ba Singapura ikus liu fila hikas ba Vatikanu.
Dadaun ne’e, Estadu Timor-Leste halo preparasaun másimu tebes tanba iha fulan-fevereiru liuba Governu aprova ona orsamentu hamutuk millaun $12 hodi halo preparasaun.
Iha preparasaun ne’e hanesan hadia estrada sira iha kapitál Dili, re-abilita igreja Katedrál Dili, re-abilita Uma Adat Tasi-Tolu no seluk tan.
Notísia relevante Marco Sprizzi elojia preparasaun Estadu kona-ba Papa Francisco vizita TL
Jornalista: Hortencio Sanchez
Editór: Florencio Miranda Ximenes