iklan

NASIONÁL, DILI, HEADLINE, SOSIEDADE SIVĺL

Marco Sprizzi elojia preparasaun Estadu kona-ba Papa Francisco vizita TL

Marco Sprizzi elojia preparasaun Estadu kona-ba Papa Francisco vizita TL

Reprezentante Vatikanu iha Timor-Leste, Monseñor Marco Sprizzi. Imajen Tatoli/Egas Cristóvão.

DILI, 12 fevereiru 2024 (TATOLI)–Reprezentante Vatikanu iha Timor-Leste Núnsiu Apostóliku, Monseñor Marco Sprizzi, elojia preparasaun Estadu Timor-Leste kona-ba preparasaun Papa Francisco atu vizita Timor-Leste iha agostu nia klaran tinan 2024 ne’e.

Notísia Relevante: PM Xanana garante seguransa ba vizita Amu Papa Francisco mai Timor-Leste

“Ha’u bele dehan katak Governu timorense halo hela preparasaun ida exelente. Ita simu delegasaun vatikanu iha loron hirak liuba durante loron tolu hodi impresionadu fatin hotu-hotu ne’ebé Santu Padre sei vizita no realiza eventu hotu. Konvida timoroan hotu-hotu sei partisipa,” Reprezentante Vatikanu iha Timor-Leste Núnsiu Apostóliku, Monseñor Marco Sprizzi, hateten ba jornalista sira hafoin hala’o enkontru ho Prezidente Repúblika, José Ramos Horta, iha Palásiu Prezidensiál Nicolau Lobato, Bairru Pite, segunda ne’e.

Nia refere delegasaun Vatikanu impresionadu ba traballu ne’ebé Governu timorense prepara hela, nune’e nu’udar reprezentante vatikanu lori Vatikanu nia naran hato’o agradesimentu ba Prezidente Repúblika, Primeiru-Ministru no ministru sira hotu ba servisu boot ne’ebé efisiente, eclenete kompetente ne’ebé la’o hela ba eventu Papa Francisco mai vizita Timor-Leste.

Núnsiu Apostóliku ne’e, hateten seidauk bele anunsia data fixa kona-ba Papa Francisco nia vizita ne’e, maibé ida-ne’e sei anunsia hosi Santa Sé juntamente ho Vatikanu no Governu maibé parte Governu ho igreja timorense serbisu hela konaba preparasaun kona-ba posivel vizita ne’ebé ema hotu hein.

Monseñor esplika, Papa Francisco sei halo vizita Estadu ida maibe prinsipalemente vizita pastorál ida nuúdar padre ida-ne’ebé mai vizita nia povu ka sarani sira.

“Preokupasaun Papa nian mak povu bele hasoru nia no nia bele hasoru nia povu. Agora nasaun ida hanesan Timor, ne’ebé ema hotu hakarak hasoru Papa, irmaun no irmás relijiozu sira atu partisipa festa povu nian mak garanta seguransa, saúde, transporte, fatin dignu, atu ema hotu bele partisipa di’ak ba eventu hanesan misa ne’ebé preside hosi Papa,” nia dehan.

Monseñor garante, Papa Francisco mós laiha preokupasaun seluk, maibé iha konfiansa no Papa Francisco koñese liu timoroan sira, iha domin boot ba povu ida-ne’e no Santu Padre iha espektativa ksolok nian ba preparasaun sira ba vizita ida-ne’e.

Notísia Relevante: Igreja hein data fiksu Papa Francisco vizita Timor-Leste hosi Vatikanu

Jornalista : Jesuína Xavier

Editór       : Cancio Ximenes

iklan
iklan

Leave a Reply

iklan
error: Content is protected !!