DILI, 30 janeiru 2024 (TATOLI)—Arsebispu Arkidioseze Metropolitana Dili, Don Virgílio Kardeál da Silva do Carmo, SDB, hateten igreja sei hein data fiksu Papa Francisco atu mai vizita Timor-Leste ne’e hosi Vatikanu.
Notísia Relevante: Tinan ne’e, Papa Francisco konfirmadu vizita Timor-Leste
“Ita sei hein konfirmasaun kona-ba data, no bainihira mak to’o iha ne’e. Loos duni informasaun ne’e la’o, ema hotu rona maibé to’o agora sei hein konfirmasaun ikus,” Don Virgílio Kardeál hateten ba jornalista sira hafoin fó pose ba dirijente Universidade Católica de Timor-Leste (UCT) São João Paulo II iha salaun UCT, Balide, tersa ne’e.
Preparasaun ba Papa Francisco nia vizita ne’e, to’o agora seidauk bele halo tanba sei hein konfirmasaun no bainhira data loos ona mak Governu ho igreja sei halo preparasaun.
“Agora kona-ba komunikasaun ne’e ita iha no halo maibé buat hotu presiza data konfirmasaun hafoin ita bele ko’alia sai, saida mak halo ona no saida mak seidauk ne’e hein konfirmasaun,” nia dehan.
Notísia Relevante: Vizita Vise PM Santa Se nu’udar preparasaun Papa Francisco atu vizita Timor-Leste
Jornalista : Osória Marques
Editór : Cancio Ximenes
