OÉ-CUSSE, 12 abríl 2024 (TATOLI) – Natar na’in-sira iha natar Kakatua, suku Lifau, sub-rejiaun Pante Makasar, husu Autoridade Rejiaun Administrativa Espesiál Oé-Cusse Ambeno (RAEOA) liuhusi Sekretaria Rejionál Agrikultura atu apoi adubu orgániku Ako’y Magsasakang Orgániku (AMO).
Notísia relevante: PA RAEOA lansa adubu orgánika hasa’e produsaun no hamate Lakataru
Agostinho Sila, nu’udar natar na’in, iha Kakatua, esplika razaun husu apoia adubu orgánika AMO, tanba natar sira iha Kakatua ektare 31,16 mai hosi benefisiáriu 112, ameasa falla kolleta hafoin hetan atakasaun maka’as husi peste lakataru.
“Ami preokupa tanba lokasi natar Kakatua, foin daudaun ami kuda hetan estragu hosi ular, agora hetan atakasaun tán hosi hama (kameru), foin daudaun ami hatama ona karta ba servisu agrikultura atu apoia ai-moruk, maibé seidauk apoia, ne’e maka ami husu ba oin tenke tau matan mai ami, atubele prevene hare sira-ne’e, tanba isin ona maibé ular oan ka hama haan beibeik dalaruma ami labele kolleta,” Agustinho Sila, ba Agência Tatoli iha natar Kakatua, Lifau, sesta ne’e.
Iha fatin hanesan, Mateus Auni nu’udar natar na’in, husu ba Ministériu Agrikultura liuhosi Sekretaria Rejionál ba Asuntu Agrikultura, bele konsidera, tanba maioria natar sira iha Kakatua Lifau, daudaun ne’e iha hela ameasa falla kolleta.
“Ami iha ne’e problema boot, ami-nia natar sira ular ataka maka’as, ha’u-nian laiha problema, maibé viziñu sira la konsege koa, tanba hama estraga hotu hare isin, ami husu Ministériu Agrikultura, sei bele karik tinan oin antes ami kuda, presiza mai akompaña ami,” nia fó hanoin.
Agrikultór ne’e halo komparasaun, iha tinan hirak kotuk agrikultór sira iha natar Kakatua, maioria uza adubu (pupuk) anorgánika maibé folin karun, saka ida presu to’o $100 dollár.
Maibé kompara ho abudu AMO ne’e nia kualidade di’akliu tanba la’ós haburas de’it hare, maibé bele hamate mós hama ka peste lakataru no bele hasa’e mós produsaun.
“Ha’u agradese ba Diresaun Rejionál Agrikultura, tanba durante ne’e hetan apoia ai-moruk AMO, ne’ebé ba oin ne’e kontinua akompaña ami, tanba durante ne’e, ha’u uza ai-moruk AMO, ha’u-nia haree iha natar moris di’ak, maibé ha’u-nia maluk sira iha sorin la uza, hetan problema atakasaun hosi peste no balu laiha isin,” nia orgullu.
Notísia relevante:Autoridade RAEOA kolleta batar ektare 12 iha Nipani
Entretantu, kona-bá asuntu ne’e, Agência Tatoli tenta konfirma ho servisu agrikultura RAEOA liuhosi Diretór Rejionál Agrikultura, Amaro Efi, maibé daudaun ne’e hala’o hela servisu iha nasionál, Dili.
Antes ne’e iha fulan fevereiru 2024 ne’e, Prezidente Autoridade RAEOA, Rogério Tiago Lobato, halo ona lansamentu ba adubu orgániku AMO ba natar ekatre 2 iha natar Holosa, suku Lalisuk, sub-rejiaun Pante Makasar.
Notísia relevante: Produsaun batar no hare durante tinan tolu iha Oé-Cusse hatudu mudansa
Jornalista: Abílio Elo Nini
Editór: Evaristo Soares Martins
