iklan

INTERNASIONÁL

Serbisu ho disiplina no profisionál hodi hadi’a ekonomia família: Xanana apela

Serbisu ho disiplina no profisionál hodi hadi’a ekonomia família: Xanana apela

Primeiru-Ministru, Kay Rala Xanana Gusmão. Imajen Tatoli/Francisco Sony

DILI, 13 abríl 2024 (TATOLI)– Primeiru-Ministru (PM), Kay Rala Xanana Gusmão apela ba Timor-oan sira ne’ebé hala’o atividade no manán espriénsia servisu oin-oin iha Reinu Unidu atu

Serbisu ho disiplina no profisonál hodi hetan osan hadi’a ekonomia família, no kontribui ba dezenvolvimentu Timor-Leste.

“Ba Timor-oan sira tomak ne’ebé mai buka oportunidade para mai hadi’a sira-nia moris iha Reinu Unidu, hakuak bo’ot no domin tomak ba imi. Imi-nia família tomak hatene imi ba buka esforsu aan iha ne’e, primeiru tanba ita-nia rain seidauk bele oferese servisu ba ema hotu no segundu aproveita oportunidade ida ne’e imi hadi’a família-nia vida iha Timor,” PM Xanana hato’o mensajen ne’e liuhosi nota ne’ebé Agência Tatoli asesu sábadu ne’e.

Xefe Governu husu ba Timor-oan hotu-hotu hatudu a’an hanesan   embaixadór foinsa’e atu presta servisu ho disiplina, badinas hodi manán espriénsia serbisu no hetan konfiansa hosi povu no Estadu Reinu-Unidu.

“Imi ajuda família iha Timor- laran, imi sira hotu ne’ebé hela iha rai seluk, ita kustume dehan katak, imi ida-idak, sai mós hanesan embaixadór ita-nia rain nian ba iha komunidade ne’ebé imi serbisu ba. Ne’e duni favór hatudu imi-nia komportamentu ne’ebé di’ak, imi-nia disiplina ne’ebé aas, no entrega tomak ba serbisu hodi hetan konfiansa hosi sira ne’ebé fó hela servisu ba imi no Governu Reinu Unidus Lori governu nia naran, ha’u tenki agradese ba imi-nia partisipasaun ne’ebé imi hatudu hodi haruka netik buat ruma ba família hodi hadi’a família nia moris, no imi kontinua servisu no hatudu katak, imi Timoro-oan foti aas ita-nia rain, hosi imi-nia komportamentu,” Eis Prezidente Repúblika ne’e dehan.

Governu liuhusi Emabixada Timor-Leste iha Reinu Unidu kontinua nafatin habelar ninia programa diplomatika nian no tau matan ba Timor-oan sira hotu ninia kondisaun.

PM hatutan, foin lalais selebrasaun loron natal, tinan foun to’o misa Paskua sarani rihun ba partisipa misa la’o avontade, tanba problema komesa redús hodi kontribui harii pás no garante estabilidade.

“Ita hotu tenki hamutuk ho esperitu ba dame, esperitu ba hadomi malu, hodi ita nia rain bele dezenvolve a’an,” Líder Karismátiku ne’e apela.

Iha ámbitu ne’e, Primeiru-Ministru IX Governu Konstitusionál informa mós katak, Governu kontinua suspende atividade Grupu Arte Marsiál (GAM) no Grupu Arte Rituál (GAR) hodi hein atu loke programa kompetisaun desportu nivel nasionál.

Iha fatin hanesan, Prezidente Asosiasaun Timor iha sidade Peterborough-Reinu Unidu, Celso Oliveira konsidera mensajen Xefe Governu importante hodi motiva Timor-oan sira kontinua servisu disiplina no promove kultura no unidade nasionál entre Timoroan.

“Ho respeita no hadomi tomak hodi rona mensajen hosi ita-nia aman, Primeiru-Ministru, Kay Rala Xanana Gusmão hodi hato’o mensajen ida hanesan aman ba oan sira no husu atu kontinua nu’udar Timor-oan servisu nafatin kontribui ba ekonomia família no ba dezenvolvimentu ba ita Timor-oan sira,” nia orgullu.

Celso Oliveira agradese ba Governu Timor-Leste ne’ebé halo esforsu maka’as atu kontinua sosa rai hodi harii embaixada Timor-Leste nian iha Reinu Unidu hosi fasilita servisu governu no atende Timor-oan sira.

Nia hatutan, durante ne’e Asosiasaun Timor iha sidade Peterborough-Reinu Unidus mós sempre selebra eventu desportu no selebrasaun kultura hodi promove identidade Timor-Leste nian no kontinua bolu atensaun ba ema hotu mantein pás iha ida-idak nia hela hela fatin no fatin serbisu sira.

Bazeia dadus tinan-2017 Timor-oan iha Reinu Unidu hamutuk 16.000, Embaixada seidauk rejista hikas Timor-oan sira, iha parte seluk Timor-oan sira barak mós seidauk ba halo rejista iha Embaixada Timor-Leste iha Londres.

Jornalista : Antónia Gusmão

Editór: Rafael Ximenes de A. Belo

 

iklan
iklan

Leave a Reply

iklan
error: Content is protected !!