DILI, 12 abríl 2024 (TATOLI)–Diretór Servisu Edukasaun munisípiu Manatuto, Patrício da Cruz Quintão, hateten edukasaun munisípiu Manatuto sei lansa no implementa Programa Merenda Eskolár (PME) iha 22 abríl 2024 ne’e.
Notísia Relevante: Komisaun G iha PN husu hadi´a implementasaun merenda eskolár
“Problema merenda eskolár ne’e foin lalais ita halo pedidu atu komesa iha 01 abríl, maibé falla ne’e iha finansa entaun ita atrazu fali, parese iha 22 abríl ne’e mak foin halo lansamentu tanba tuir kalendáriu edukasaun nian ne’e ita ferias hela. Nune’e, ita sei lansa no implementa iha 22 agora,” nia hateten ba Agência Tatoli liuhosi telefonika, sesta ne´e.
Tanba, tuir nia, orsamtu tama hotu ona ba konta Ekipa Jestaun Programa (EJP) nian, tanba ne’e hein atu atu lansa no implementa de’it.
“Ita iha pedidu ne’ebé boot entaun sira husu atu foti dala rua, maibé ba seluk ne’ebé ho orsamentu kiik tama dala ida iha konta sira-nian,” nia dehan.
Orsamentu Programa Merenda Eskolár ba Munisípiu Manatuto millaun $1.033 ne’ebé sei benefísia ba estudante 13.766, ne’ebé aloka ba Eskola Pre-Eskolár (EPE) hamutuk $103.320, agora ba Ensinu Báziku (EB) hamutuk $ 929.880”, nia dehan.
Estudante ne’ebé sei benefísia hosi PME ba tinan 2024 ne´e Eskola Pre-Eskolár (EPE) hamutuk 1.149, Ensinu Báziku hamutuk 12.617 no totál EPE públiku, privada, fundasaun no komunidade hamutuk 21 no totál EB públiku, katólika, fundasaun no komunidade hamutuk 19.
Grupu Ekipa Jestaun Programa (EJP) ba tinan 2024 nian hamutuk 18 no aihan ne’ebé atu fornese ba estudante sira mak produtu lokál sira ne´ebé sei jere hosi grupu EJP ho estudante sira-nia inan-aman sira.
Entretantu Eskola Sekundáriu Jerál (ESJ) públiku hamutuk tolu (3), privadu haat (4), Eskola Sekundáriu Tékniku Vokasionál (ESTV) iha tolu (3). Agora, totál estudante iha ESJ públiku no privadu ba tinan eskolár 2024 hamutuk 2.613 no estudante ESTV iha 243.
Jornalista : Osória Marques
Editór : Cancio Ximenes
