DILI, 15 abríl 2024 (TATOLI)–Vise-Prezidente Komisaun Organizadora Vizita Amu Papa no Ministru Administrasaun Estatál, Tomás do Rosário Cabral, hateten, Papa Francisco nia vizita mai Timor-Leste iha setembru tinan ne’e ho misaun rua.
“Hafoin ita akompaña iha loron 12 abríl nunsiatura no igreja Timor fó sai ona kalendáriu fiksu ba vizita Amu Papa mai Timor-Leste iha loron 09 to’o 11 setembru 2024, ho ida-ne’e ohin ha’u mai hasoru malu ho Kardeál hodi ko’alia kona-ba Governu nia apoiu ba preparasaun vizita ne’e, tanba Amu Papa nia vizita mai Timor ne’e ho misaun rua mak hanesan vizita Estadu no Pastorál,” Ministru informa hafoin hasoru malu ho Arsebispu Arkidioseze Metropolitana, Dom Virgílio do Carmo da Silva, iha sede Episkopál, Lecidere, segunda ne’e.
Vizita Pastorál ne’e sei koordena husi Arsebispu Arkidioseze Metropolitana, Dom Virgílio do Carmo da Silva, nu’udar igreja lokál no vizita Xefe Estadu ba Estadu Timor-Leste sei koordena husi nunsiatura ho Estadu Timor-Leste.
“Entaun, Amu Papa mai ne’e vizita kortezia Estadu sei hasoru Prezidente Repúblika no Primeiru-Ministru, Amu Papa to’o Aeroportu Comoro sei simu husi Estadu no Governu Timor-Leste hanesan Xefe Estadu Vatikanu iha Aeroportu Comoro Dili,” nia akresenta.
Notísia relevante : PR Horta husu líder nasionál fó liman ba malu simu Amu Papa iha Setembru
Hafoin simu tiha Amu Papa iha Aeroportu, kontinua mai iha Palásiu Prezidensiál halo enkontru kortezia ho diplomata sira hotu mak kontinua fali vizita atividade Pastorál nian ba iha igreja katólika Timor nian.
“Prezensa Governu ho igreja katólika no nunsiatura tanba Governu fó apoiu ba atividade rua, ne’ebé sei hala’o vizita husi Amu Papa ne’e tanba Governu nia papél apoia igreja katóliku, liu-liu mobilizasaun ita-nia sarani sira husi munisípiu mai partisipa misa no prepara fatin ba misa iha Tasi-tolu,” nia tenik.
Fatin sira ne’ebé daudaun Governu prepara hela ba Amu Papa atu mai ne’e la’ós Governu no igreja mak hili, maibé ekipa husi Santa Sé rasik nune’e Amu Papa bele halo nia atividade.
Amu Papa ho delegasaun sei hela iha nunsiatura, enkuantu Amu Bispu no Kardeál sira hela iha Hotel Timor, jornalista 85 hela iha Otél Novo Turismo, Timor Plaza, tanba kredensiál mós mai husi sira.
“Entaun, ohin ne’e ha’u hasoru malu ho Kardeál no Monseñor oinsá ita ko’alia serbisu preparativu ba enkontru bilaterál ne’ebé sei hala’o iha Dili hodi halo preparasaun másimu simu Amu Papa,” Ministru informa.
Atividade haat iha Dili
Governu fó apoia ba igreja katólika durante vizita Amu Papa, ein termu prepara kondisaun serbisu hamutuk ho igreja no Santa Sé iha Timor-Leste, tanba Amu Papa nia vizita bilaterál durante oras rua de’it, restu iha kalan rua no loron tolu sei halo vizita pastorál mak barak.
Durante vizita Amu Papa iha Timor-Leste, sei hala’o atividade haat iha Dili hanesan hasoru malu ho Katekista, Madre, Padre, Amu Bispu sira iha Katedrál, hasoru joven sira iha Sentru Konvensaun Dili, hasoru Madre Alma sira iha Bebonuk inklui misa iha Tasi-tolu.
Sarani sira ne’ebé sei partisipa misa iha tasi-tolu sei la’o tuir kada Parókia tanba iha Tasi-tolu sei tau hotu serku ho besi hodi separa munisípiu sira. Komisaun organizadora sei tau fatin ba peregrinu sira ne’ebé mai, nune’e bainhira tama Tasi-tolu sei organizadu, Governu no igreja sei prepara kondisaun maibé mobiliza sarani atu mai partisipa iha Tasi-tolu ne’e sei organiza husi Prezidente Autoridade ida-idak hamutuk ho Pároku sira mak organiza.
“Durante vizita Amu Papa sei iha jornalista internasionál hamutuk 85, hamutuk ho mídia lokál tolu mak hanesan mídia online rua no mídia imprime ida. Mídia tolu ne’e tama hotu ba ekipa jornalista 85 atu halo kobertura ba atividade sira. Maibé ida-ne’e sei deside husi Sekretáriu Estadu Komunikasaun Sosiál, ita iha mídia tolu reprezenta Timor-Leste tama ba ekipa jornalista na’in-85 ne’e, tanba kartaun asesu mós sei manda husi ne’ebá,” Ministru esplika.
Governante ne’e dehan, mídia lokál sira ne’ebé labele asesu ba laran bele asesu fali liuhusi ekran ne’ebé monta iha Tasi-tolu.
“Ida-ne’e ajuda mídia bele halo kobertura tanba live sei iha no nia parte mós ko’alia ona ho Kardeál bele autoriza fotografer ida ka rua bele asesu atividade ne’e tanba atividade ba ona altar ne’e vatikanu nian ona,” nia salienta.
Esforsu asegura liña internet
Iha parte seluk, Ministru Tomás do Rosário Cabral hateten Governu sei halo preparasaun másimu hodi asegura liña internet durante vizitasaun Papa Francisco mai Timor-Leste.
“Kona-ba liña internet, Ministru Transporte no Komunikasaun, Miguel Manetelo, bolu ona operadór telekomunikasaun tolu agora iha ona nível koordenasaun oinsá halo preparasaun másimu hodi asegura liña internet ho di’ak durante vizitasaun Amu Papa iha Timor-Leste,” governante ne’e tenik.
Nia dehan, Governu sei halo esforsu hosi asegura liña internet la’o di’ak durante Amu Papa iha Timor hodi hala’o atividade haat hanesan vizitasaun pastorál iha Katedrál, Madre Alma Dili, hasoru malu ho juventude iha Sentru Konvensaun Dili no misa iha Tasi-tolu.
“Agora iha ona nível koordenasaun tanba ministériu bolu ona operadór telekomunikasaun tolu ne’e oinsá fornese internet ne’ebé di’ak tanba kritériu ne’ebé mai hosi Santa Sé ne’e mak internet,” nia akresenta.
Iha sorin seluk, Diretór Ezekutivu Ajénsia Teknolójia Informasaun no Komunikasaun Timor, Instituisaun Públiku (TIC Timor, I.P), Venâncio Pinto, hateten, sira-nia parte preparadu bainhira Governu husu tulun atu halo preparasaun apoiu ka asegura liña internet.
“Ami prontu no preparadu iha sá tempu de’it Governu presiza asegura liña internet durante vizitasaun Papa, maibé nia maneira sira ne’e desizaun hotu sei fó sai husi Governu tanba iha ona komisaun organizadora,” nia dehan.
Jornalista : Arminda Fonseca
Editora : Julia Chatarina
